Jú, það var
myndað. Að vísu var aðeins myndað innandyra og út um glugga því veðrið hefur ekki gefið tilefni til útiveru. Frá skírdagskvöldi var samfelld innivera fram yfir hádegi á laugardegi. Þá gaf í sundlaugina og þar var setið á annan tíma í félagsskap íslenskra og ítalskra ferðamanna. Það er alveg makalaust hvað þessir bannsettir Ítalir geta verið háværir og hraðmæltir auk þess sem þeir virðast deila þeirri skoðun þýskra ferðamanna að þegar þeir hafi greitt sundlaugargjaldið eigi þeir ekki bara aðganginn heldur svæðið eins og það leggur sig.
Þegar lagt var upp í gönguferð á skírdag var maður frá læjónsklúbbnum hér í Stykkishólmi mættur á Borgarbrautina til að selja páskaliljur. Ég sló um mig með tvöþúsundkalli enda er tvöþúsundkall lágt gjald fyrir gott og upplýsandi spjall við heimamann. Það var engan blómavasa að finna á Borgarbrautinni svo kaffikannan sem fékk það hlutverk í febrúarbyrjun 2011 ( á stórafmæli Elínar Huldar) fékk aftur sama hlutverk. Hér að neðan birtast myndir frá báðum tilefnum:
Svo var páskaeggið myndað með páskaliljunum:
....og svo éljaði og éljaði og það rauk upp með stormhraglanda svo ekki var hundi út sigandi:
Svo rigndi og þá fór snjórinn:
Þannig gekk þetta afturábak og áfram. Það var því fátt betra að gera en að sitja við tölvuna og láta sig dreyma:
.....alveg eins og fyrir rúmum þremur árum, á nákvæmlega sama stað:
Sem betur fer hafði Gulli, Gunnlaugur Valdimarsson frá Rúfeyjum, gefið mér heilan bunka af Sjómannablaðinu Víkingi frá árunum 1965-69 við komuna í Hólminn á miðvikudaginn og það var því hægt að taka pásur frá tölvugruflinu og sökkva sér í blöðin. Þar var að finna þónokkur gullkorn og ekki er að vita nema nokkur þeirra eigi eftir að birtast hér á síðunni. Svo voru auðvitað nokkrar góðar bækur með í för:
Inniverunni á föstudaginn fylgdi samt örlítill leiði og þessum leiða fylgdi löngun í súkkulaði. Ég er súkkulaðifíkill eins og oft hefur komið fram, höndla ágætlega páskaegg í plastumbúðum en þegar þær hafa verið fjarlægðar er eggið fljótt að hverfa. Það var akkúrat það sem gerðist - eggið með græna páskaunganum hvarf eiginlega á örskotsstundu og til að ekki liði páskadagur án eggs fór ég í Bónus á laugadaginn (í gær) og keypti endingargott egg uppá eitt kíló!
Ég barðist lengi morguns við freistinguna. Fékk mér morgunmat og kaffi á eftir, gerði semsagt allt til að teygja líftíma þessa risaeggs:
.......en um síðir falla flest vígi og svo fór einnig um þetta:
Klukkan er að ganga fjögur á þessum páskadegi og enn gengur á með dimmum éljum. Súkkulaðifíknin hefur heldur rénað og ég er eiginlega kominn með nóg í bili af þesslags dóti. Svo er líka lambalæri í kvöldmatinn og ég ætla að eiga magarými fyrir það, enda er lambakjöt eitt það albesta sem ég borða - og svo líka allt hitt......
Þetta verður samt að vera alveg extragott læri ef það á að toppa folaldið sem var í matinn á föstudagskvöldið langa....
...og
nú út að ganga áður en næsta hryðja gengur yfir!
.Það er morgunn lengsta
föstudags ársins. Frá því á miðvikudagssíðdegi hefur ýmislegt gengið á - aðallega þó í veðrinu. Hér hafa skipst á dimm él, rigningardembur, rokhviður og fleiri tilbrigði íslensks veðurfars hafa einnig látið á sér kræla. Ég fór í Bónus í gær til aðfanga og sá þar stærsta páskaegg sem ég hef látið mig dreyma um, heilt kíló af súkkulaði er enginn smáfengur fyrir súkkulaðifíkil sem hefur enga löngun til bata og ég er að hugsa um að sækja mér svona egg rétt fyrir lokun búðar á morgun - laugardag. Það ætti þá að endast eitthvað fram á páskadaginn sjálfan.
Það er hálfeinmanalegt hér án Bassa, sem ekki má dvelja í svona félagsbústað eins og ég er í. Hann er í góðu yfirlæti (og þá meina ég góðu.....) hjá fyrri eigendum í Hafnarfirði og ég veit að þar er dekrað við hann fram úr öllu hófi. Hann er reyndar ekki óvanur slíkum trakteringum, hundurinn er löngu orðinn alger dekurrófa enda eftirlæti flestra sem honum kynnast.
Það er annars helst að frétta að súðbyrðingurinn Bjartmar, sameign okkar Gulla, hefur verið afskrifaður sem skip. Það þýðir ekki að hann sé talinn ónýtur heldur er einfaldlega ekki talin eign í honum lengur. Báturinn hefur verið til sölu nokkuð lengi en enginn viljað kaupa - a.m.k. ekki fyrir ásættanlegt verð - og nú er svo komið að vélin verður tekin úr honum, hreinsuð upp og seld sérstaklega, enda er hún prívateign Gulla og miðað við aðstæður í raun það eina sem einhver eign er í. Skrokkurinn fellur til mín og mun verða fluttur til Reykjavíkur í fyllingu tímans. Um framhaldið er óvíst en það má búast við að einhver not verði fyrir hann að undangengnum frekari lagfæringum og breytingum. Bjartmar sem slíkur hefur semsagt siglt sinn síðasta sjó og hverfur úr sögunni á fjörukambinum í Gullhólmavík.
Það er heldur að birta í lofti þó enn blási hressilega. Ég gæti trúað því að myndavélinni yrði beitt eitthvað í dag...........
Það er miðvikudagsmorgunn og ég er aftur staddur í Höfðaborg eftir skottúr
á fjörðinn fríða. Nú er endurnýjað í töskunum, einhverju bætt við til lengri
dvalar því eftir hádegið liggur leiðin upp í Stykkishólm þar sem dvalið
verður um páskana. Heimsins flottasti hundur, Edilon Bassi Elínarson Breiðfjörð
Thorsteinsson Budenhof Sandhaug Sóðalöpp (þessi tvö síðasttöldu nöfn eru til
komin vegna endalauss sandburðar inn á parkettið í Höfðaborg og upp í
"snjó"hvíta leðursófasettið!) er kominn til sinna fyrri eigenda til
páskadvalar og gegnir nú tímabundið nafninu Edilon B. Eyjólfsson Hafnfjörð.
Ég á örfáar myndir úr vesturferðinni og bæti þeim hér neðan við þegar ég
kem upp í Hólm.....
......og nú er miðvikudagskvöld, ég kominn upp í Stykkishólm og skelli inn myndum af veðri og færð á leið til og frá Ísafirði. Það var annars ekkert að færðinni sunnudaginn 13 apríl þegar við ókum vestur, reyndar hef ég líklega aldrei séð Hvammsfjörðinn jafnsléttan og þennan dag:
Ég smellti einni af á Hólmavík, ekki sem sögulegri heimild heldur til að þeir sem heima sátu gætu glöggvað sig betur á ferðaveðrinu:
Það var talað um krap á Steingrímsfjarðarheiðinni. Þar var litlu logið, víst var á henni krap en það var hins vegar aðeins á nokkur hundruð metra kafla. Að öðru leyti var júlífæri...
Þegar komið var niður í Djúpið mætti manni þessi endalausa vestfirska veðurblíða. Myndirnar eru teknar í Ögurnesi og skilin milli snjóbreiðunnar á Snæfjallaströndinni og sinunnar í vestanverðu Djúpinu eru sláandi.....
Svo var það
engilblíðan í Skötufirðinum:
Það var svo sem ekkert nýtt að mynda á Ísafirði. Fólk hittist, erindum var sinnt, dagur leið og svo vorum við aftur á suðurleið. Einhvern veginn er það svo að maður fær sjaldan sama veður í báðum ferðum og þetta skiptið var engin undantekning. Veðurblíðan á myndunum einskorðaðist við sunnudaginn þrettánda, mánudagurinn var öllu hryssingslegri en steininn tók þó úr á þriðjudeginum - s.s. í gær. Dagurinn heilsaði með snjóéljum í vindrokum, flugleiðin var ófær og landleiðin líka skv. fréttum Vegagerðarinnar. Farartálminn var Steingrímur - ekki í fyrsta sinn. Á textavarpinu mátti þó lesa að vegurinn myndi opnast um hádegi og við lögðum af stað suður aftur um kl. hálfeitt. Í Djúpinu skiptust á dimm snjóél án þess þó að snjó festi, og glaðasólskin með sumarfæri. Þegar upp á Steingrímsfjarðarheiði kom mátti þó vel sjá hvar vegurinn hafði lokast nóttina áður enda var þykk snjóröst beggja vegna vegar á a.m.k. tveimur stöðum. Snjó dreif enn yfir veginn á köflum en þó var þokkalega stikubjart. Moksturstæki voru enn að hreinsa veginn og umferð var allnokkur.
Þegar niður af Norðdalnum kom var sumarfæri sem fyrr og þegar lagt var á Arnkötludalinn ókum við fram á fyrsta marktæka vorboðann - Vegagerðarapparat með sóp að framan sem ók kantana og sópaði af þeim möl og sand.
Vegurinn um Þröskulda var nær auður, aðeins minniháttar krap um hæsta kaflann. Afgangurinn af leiðinni suður var marauður utan annan minniháttar krapkafla á Bröttubrekku. Við komum til Reykjavíkur um kvöldmatarleytið í gærkvöldi. Þegar þessar línur eru skrifaðar á miðvikudagskvöldi 16. apríl í Hólminum er kuldaþræsingur og kvöldgangan hafði nær gengið af mér eyrnalausum.
Húfur eru nefnilega bara fyrir kjéllíngar...........
Máltækið sem notað er sem
fyrirsögn á pistilinn er að vísu notað um alvarlegri tilfelli en hér á við og ætti kannski ekki að hafa í flimtingum. Hvað eru annars flimtingar?
Ég sef allavega ekki í Höfðaborg næstu tvær nætur.
.....og hvers vegna ekki?
Jú, vegna þess að ég er á leiðinni út á land. Ekki með sjálfum mér. Eða þannig, sko...
Já, ég sagði það! Uppnám!
.....og hverjum er það að kenna? Jú, helvískum Norðmönnunum - einu sinni enn! Hafiði séð norsku veðurspána fyrir páskana?
Ekki?
Núnú - kíkið þá á yr.noog sjáið sjálf! Það er spáð hörkugaddi í Hólminum um páskana. Einmitt þegar stórskipið Stakkanes átti loksins að fara uppeftir. Aukinheldur er spáð slyddu eða éljagangi á laugardaginn og ekki langar mig að draga bát á tveimur kerrum yfir Vatnaleiðina í hálku.
Niðurstaðan er einföld: Stakkanesið verður eftir hér syðra en ég fer í Hólminn með kuldagalla, kuldaskó og flestar bækur Bergsveins Skúlasonar, og eyði páskunum við lestur og göngutúra. Jú, og kaffidrykkju hjá Löllu og Gulla!
Þá er hægt að koma sér að efninu.
Ofan við efri myndina í síðasta pistli er lítill svigi. Í honum er vikið nokkrum orðum að lítilli trillu sem ég keypti síðsumars ´94 af Herði heitnum Bjarnasyni skipstjóra á Ísafirði. Hörður hafði verið að dunda við þessa trillu úti í Krók og víðar, og hafði m.a. smíðað á hana laglegt stýrishús og hvalbak. Raunar var hornið svo lítið að vafasamt var hvort Hörður - sem var ekki með lægstu mönnum - kæmist fyrir í stýrishúsinu. Það reyndi hins vegar aldrei á það því eins og fyrr segir eignaðist ég bátinn síðsumars ´94 og flutti hann inn að steypustöð. Með bátnum fylgdi ágætis tveggja strokka ALBIN bensínvél, á að giska 10-12 hestöfl. Það var ekki mín ætlun að nota bátinn heldur ætlaði ég fyrst og fremst að eiga vélina og stýrishúsið því þá þegar voru hafnar vangaveltur um bátinn hans Gumma Maríasar og hugmyndin var að nota stýrishúsið hans Harðar Bjarna og ALBIN vélina í þann bát. Vélin var sett á bretti inn í hús og stýrishúsið var sömuleiðis sett inn í geymslu. Trilluskrokkurinn frá Herði Bjarna stóð því einn og sér á planinu innan við steypustöðina. Hinu megin við húsið stóð svo trillan hans Gumma Maríasar og beið endurbyggingar.
Einhverntíma um haustið komu menn úr Súðavík í steypustöðina. Með þeim var Hafsteinn Björnsson frá Seljalandi í Álftafirði. Við Hafsteinn vorum kunnugir frá gamalli tíð og upphófst nú spjall, m.a. um litlu trilluna á planinu. Hafstein langaði í bátinn og spjallið spannst útí samningaviðræður. Þegar upp var staðið taldist hann eigandi bátsins en ég fékk í staðinn forláta PERKINS utanborðsmótor með tilheyrandi bensíntanki og einhverju fleiru. Nokkrum dögum síðar fóru skiptin fram og báðir undu glaðir við sitt. Hafsteinn flutti bátinn inn í Súðavík og setti hann inn í bílskúr við húsið sitt í Túngötunni.
Svo kom vetur, sem - eins og segir í síðasta pistli - komandi kynslóðir munu minnast sem mannskaðavetrarins í Súðavík. Það er ekki nákvæmlega vitað hvenær flóðið kom á steypustöðina og svipti burt trillunni hans Gumma Maríasar. Það er hins vegar nákvæmlega vitað hvenær flóðið kom á Súðavík og svipti burt húsinu og bílskúrnum hans Hafsteins Björnssonar með litlu trillunni. Öll sú saga hefur verið sögð..........
Þar með átti ég laglegt stýrishús í geymslu og ágæta ALBIN bensínvél á bretti en engan bát. Þannig stóðu málin lengi vel en loks kom að því að hvorttveggja nýttist. Gunnlaugur Valdimarsson frá Rúfeyjum á Breiðafirði, þá búsettur á Ísafirði var að endurbyggja lítinn súðbyrðing og vantaði í hann vél. Við Gulli vorum ágætlega kunnugir gegnum bátabras og fleira, og það lá beinast við að hann fengi ALBIN vélina frá Herði Bjarnasyni, frænda sínum - enda skildist mér að Hörður væri "ábyrgur" fyrir búferlaflutningi Gulla til Ísafjarðar. Á þann veg var hlutum ráðið, vélin fór í bátinn og báturinn á flot.
Einn daginn leit Sigurður Ólafsson -Bíi - inn hjá okkur í steypustöðinni. Hann spurði um stýrishúsið og hafði hug á að fá það sem barnaleikfang við sumarbústað í Arnardal. Það fannst mér ágæt nýtingarhugmynd fyrir húsið og lét Bía hafa það. Ekki veit ég hvort stýrishúsið er enn við þennan sumarbústað en áhugasamir gætu athugað það.........
Þá er að segja frá endalokum ALBIN vélarinnar og þar verð ég að treysta á frásögn annarra því á þeim hluta hafði ég enga hönd. Frá Gulla mun litli súðbyrðingurinn hafa gengið til eins þeirra Kálfavíkurbræðra og borist með honum vestur til Suðureyrar. Þar komst báturinn undir forsjón umboðsmanns almættisins á staðnum. Varla hefur það þó verið guðleg forsjón því báturinn mun hafa sokkið við bryggju vegna skorts á umhirðu. Hann mun hafa verið tekinn upp og settur inn í óupphitaðan bílskúr til lengri hvíldar. Þar skilst mér að vélin hafi hafi mætt sínu skapadægri full af sjó í vetrarfrosti.
PERKINS utanborðsmótorinn frá Hafsteini heitnum Björnssyni er enn í minni eigu og geymslu, og hefur sannarlega ekki sungið sitt síðasta stef. Að öðru leyti lýkur hér með sögu tveggja báta, tveggja véla og eins stýrishúss.
Það er logn í Reykjavík - ekki á hverjum degi sem það gerist núorðið! Stakkanesið hefur fengið á sig forljótt skriðbretti sem á þó að gegna ákveðnu hlutverki. Vonandi tekst að ákvarða hvort nýr afturendi gerir eitthvað fyrir ganghraða bátsins. Ég hef nefnilega (og það hefur áður komið fram) engan áhuga á að fara í fokdýrar og tímafrekar breytingar á annars ágætum, norskum skrokki nema þær breytingar skili einhverju í ganghraða. Það skýrist á næstu dögum uppi í Stykkishólmi hvort skriðbrettið virkar ......
Næst ætla ég að birta myndir af trillu. Þetta er gömul trilla sem um árabil var vel þekkt á Ísafirði í eigu Guðmundar heitins Maríassonar fyrrum skipaafgreiðslumanns hjá Eimskipum. Þegar myndin var tekin var Guðmundur búinn að vera heilsulaus um árabil og báturinn hafi grotnað í reiðileysi á Sundauppfyllingunni við hlið kafbátsins hans Indriða í Þernuvík. Mér datt í hug að reyna að laga bátinn og talaði því við Guðmund. Við vorum vel kunnugir frá fyrri tíð þegar ég var tittur að vinna mér inn aura með kassaburði í freðfisksútskipunum. Við Guðmundur áttum ágætt spjall og að því loknu taldist ég eigandi bátsins. Ég flutti hann svo inn að steypustöð, þar sem ég var að vinna á þessum tíma og setti á skorður norðan hússins. Þar var húsrými með stórum dyrum sem ég átti að fá til afnota fyrir viðgerðina. Rýmið var reyndar fullt af drasli og rúmlega það en með sæmilegri tiltekt átti að vera hægt að mynda viðunandi vinnupláss.
Stuttu eftir að báturinn var kominn á skorðurnar settist ég inn í kaffi í Vélsmiðju Ísafjarðar hjá Braga Magg. Einhver kunningsskapur var milli Braga og Guðmundar, og Bragi spurði strax um bátinn og tilkomu hans við steypustöðina. Eftir stutt spjall var komið á hreint að Guðmundur mundi ekkert eftir okkar samskiptum og samningum um bátinn. Þótt hann hefði verið málhress og skrafhreifinn þegar við sátum að spjalli var heilsunni svona komið þrátt fyrir allt. Það var því dagsljóst að þarna þurfti einhvern milligöngumann og Bragi taldi sig sjálfkjörinn í það hlutverk. Það var búið að semja um verðið á bátnum og Bragi tók sömuleiðis að sér að taka við greiðslunni og gera þeim hluta skil. Í bátnum hafði verið fjörgömul ALBIN bensínvél, tveggja strokka og átti hún að fylgja - ef hún fyndist. Vandamálið var nefnilega það að að sögn Braga vissi enginn hvar vélin væri niðurkomin. Það gerði svo sem ekkert útslag - ég var nokkuð viss um að þessi vél yrði aldrei notuð, nema þá kannski í varahluti því ég átti aðra samskonar í ágætu lagi. Sú vél hafði komið frá Herði Bjarnasyni skipstjóra á Ísafirði og fylgdi lítilli trillu sem ég keypti af honum á sínum tíma (af bæði bát og vél er svo allt önnur saga).
Eftir að eignarhaldið á bátnum var komið á hreint gegnum Braga Magnússon var hafist handa við að taka til í rýminu sem hýsa átti bátinn. Það gekk frekar seint enda lá svo sem ekkert á - báturinn var búinn að grotna niður í mörg ár og einhverjir mánuðir til viðbótar áttu ekki að breyta neinu. Þeir gerðu það hins vegar svo sannarlega!!
Þannig var nú það. Þessar myndir eru teknar þann 22. september, eins og sjá má og það er ekki snjónum fyrir að fara á Ísafirði enda varla komið haust. Það kom hins vegar haust og á eftir því kom vetur. Komandi kynslóðir munu minnast þess vetrar sem mannskaðavetrarins í Súðavík. Það féllu snjóflóð víðar á Vestfjörðum og a.m.k. tvö þeirra féllu á og við steypustöð Steiniðjunnar á Ísafirði. Annað flóðanna rauf efstu hæð hússins sem trillan stendur við og eyðilagði flest innan dyra. Verulegur hluti þess flóðs féll niður með norðurveggnum og fyllti kvosina á myndunum. Það leið nokkur tími þar til við sem störfuðum hjá fyrirtækinu fengum að fara inn á svæðið enda talin veruleg hætta á frekari flóðum. Það var þá fyrst sem við gátum athugað skemmdir á húsum og byrgt fyrir op. Trillan var ekki sjáanleg en ég vonaði í lengstu lög að hún væri þarna einhversstaðar undir farginu og hefði ekki færst úr stað. Þegar færi gafst mokaði ég svo holu niður í flóðið þar sem trillan átti að vera undir en án árangurs - hún var ekki þar. Þá mokaði ég slóð niður fyrir húshornið á efri myndinni að stóru malarfæribandi sem lá frá mulningsvél út yfir planið. Snjóflóðið var á að giska þrír til fjórir metrar á þykkt efst því aðeins sást rétt í efri brún dyraopsins á neðri myndinni. Við höfum líklega verið þrír að moka niður að færibandinu og búnir með drjúga holu þegar við komum niður á stjórnborðssíðu trillunnar. Ég mokaði alla síðuna upp enda til enda og sá að framstefnið var rifið úr niður að sjólínu. Vonaðist samt til að ekki væri meira skemmt en það og stefnið hefði hreinlega rifnað úr við að rekast á húshornið. Gróf því næst með hálfum huga niður með borðstokknum. Ekki hafði ég mokað nema svona 20 sentimetra þegar fyrir varð borðstokkur bakborðssíðunnar. Þá lá það fyrir að báturinn var lagður saman enda til enda og yrði ekki bjargað úr því. Brakið kom svo allt í ljós þegar við beittum hjólaskóflu á skaflinn - báturinn var svo gersamlega kurlaður bakborðsmegin að varla var óbrotin spýta.
Hún endaði því á haugunum, trillan sem Guðmundur Maríasson hafði síðast dregið á óðan smokkfisk í Sundunum á Ísafirði haustið 1982.
Það var svo alllöngu seinna að ég var að kaupa járn í smiðjunni hjá Braga Magg. Upp við vegg var slönguþrykkivél ásamt fleiri vélum og talsvert af drasli í kring. Drasl er oftast áhugavert og eitthvað hef ég verið að rýna í það þegar ég rak augun í litla, rauð-og grámálaða ALBIN trilluvél sem ég kannaðist við undir eins. Þar var komin "týnda" vélin úr trillunni hans Gumma Maríasar og ef marka mátti rykið á henni var hún ekki nýkomin á þennan stað! Ég lét kyrrt liggja enda engin þörf fyrir hana lengur.
Það er
laugardagur og hún Rósa systir í Gamlabakaríinu á afmæli í dag. Maður nefnir ekki aldur kvenna - og allra síst þegar þær bera hann jafnvel og hún - en Rósa fæddist þann fimmta apríl árið 1954 og nú má hver reikna sem vill!
Höfðaborg hefur annars breyst í Flens(u)borg. Við erum helvíti lélegir, við Bassi - ég af flensu, hann af svona sýndar-samúðar- leti!
Ekki hefur þó verið setið auðum höndum í morgun heldur var skanninn tekinn fram og vænum skammti af pappírsljósmyndum breytt í tölvutækar myndir. Næsta skref er svo að hrúga þessum myndum inn í albúm hér á síðunni, en meðan verið er að vinna í myndunum verður albúmið lokað að venju.
Svo þarf ég helst að ná sæmilegri heilsu fyrir hádegið, því nú nálgast óðum hið rauða strik stórskipsins Stakkaness. Rauða strikið er þau tímamörk sem mér eru sett varðandi vinnu við bátinn því páskarnir nálgast og fyrir páska á Stakkanesið að vera komið upp í Stykkishólm. Gangi það eftir - sem ég ætla rétt að vona - rætist loks margra ára gamall draumur. Hugmyndin á bakvið smíðina á Stakkanesinu, svo og smíðin sjálf hefur frá upphafi miðast við flutning uppeftir og siglingar um Breiðafjörðinn.
Það verður stórt augnablik þegar Stakkanesið leggur af stað upp í Hólm!
Til að skreyta þenna örstutta pistil ætla ég að setja inn eina þeirra mynda sem ég skannaði í morgun. Hún er tekin í Naustahvilft gegnt Ísafjarðarkaupstað, eins og kunnugir sjá (og hinir eflaust líka). Á myndinni er Áróran mín, sem nú dvelur í Mexíkó og innir af hendi vanþakklátt sjálfboðastarf meðal innfæddra hrokagikkja og rusta. Hin stúlkan á myndinni - í rauðri peysu - er Bára Bjarnadóttir (Guðmundssonar Ingibjartssonar). Myndin er líklega tekin sumarið 2000, þ.e. stuttu eftir að við fluttum frá Ísafirði til Kópavogs. Miðað við aðrar myndir í þessu umslagi höfum við verið stödd á Ísafirði til að mála íbúðarhúsið okkar að Engjavegi 17. Það var svo selt ári síðar.
....og nú einn kaffibolla og svo út að klappa Stakkanesinu!
Öðrum hluta lauk þegar Stofuvogur opnaðist okkur innan
við Mjóanes og íbúðarhúsið gamla í Öxney blasti við. Við sigldum inn
Bænhússtraum, sjöunda strauminn í siglingunni - það mátti kannski segja að
Bænhússtraumur væri áttundi straumurinn en Geysandasund, sem við höfðum nýlagt
að baki er víst ekki talið "straumur" í skilningi eyjamanna þó ekki sé alltaf á
því lognmolla. Steinsund er hins vegar ótvíræður straumur, þó það heiti -"sund"
og á því heima í hópnum. Við flækjum málin ekki frekar en höfum
straumana sjö.
Nú vorum við í ríki Sturlu Jóhannssonar frá Öxney og
hér stjórnaði hann för. Lendingin var valin í vör rétt suðaustan íbúðarhússins,
þar skagaði grjóttangi út í sundið og við hann var talsvert dýpi. Í
kverkinni ofan og vestan tangans var vör og lítil, hlaðin steinbryggja
líkt og í Gvendareyjum. Nú var svo fallið út að ekki flaut að henni svo valið
var að leggja við allstóran klett á enda grjóttangans.
Það gætti nokkuð vinds af austri á þessum stað og
Gustur, með sína háu yfirbyggingu tók talsvert á sig. Í botninum var stórvaxinn
þaragróður og hald fyrir akkerið var lítið. Um síðir tókst þó að ná festu og
með því að nota Bjargfýling, minni og grunnristari, sem landgöngubrú varð
auðveldlega gengið á þurrt.
Nú var það Sigurður Bergsveinsson sem gæti bátanna en
Sturla hafði leiðsögu. Við gengum frá lendingunni heim til bæjar. Húsið í Öxney
er að stofni til norskt timburhús og var flutt til landsins tilsniðið eins og
svo mörg svipuð hús frá sama tíma.
Í áranna
rás var svo húsið stækkað og því breytt talsvert í útliti, settir á það kvistir
og steypt utan á neðri hæðina. Það má giska á að tilgangurinn með þeirri gjörð
hafi verið tvíþættur: Timburhús sem ekki standa á steyptum veggjum heldur nema
við jörð hafa tilhneigingu til að fúna neðantil og svo má giska á að steypan
hafi þjónað sem músavörn. Til lengri tíma litið hefur það þó sýnt sig að
"forskalning" timburhúsa var skammgóður vermir og timbrið fór illa undir slíkri
klæðningu. Önnur byggingarefni hafa einnig verið notuð til endurbóta og
þéttingar á húsinu, ágæt meðan þeirra tími stóð en standast ekki nútímakröfur.
Eftir að við höfðum litast um utan dyra bauð Sturla
okkur til stofu. Hafi ég tekið rétt eftir eru í þessu stóra húsi alls þrettán
herbergi. Varla hefur veitt af, enda oft mannmargt í Öxney þegar allt stóð í
blóma. Í einu herberginu, sem reyndar er "stásstofa" eins og það var eitt sinn
kallað, er mynd á vegg af húsinu eins og það leit út upphaflega:
Hliðarnar sem sjást á myndinni eru þær sömu og á nýju
myndunum ofar, og innandyra mátti sjá hvar gömlu útidyrnar höfðu verið. Í sömu
stofu hékk einnig uppi máluð mynd af Jónasi Jóhannsyni bónda í Öxney, afa
Sturlu Jóhannssonar:
Þau voru vönduð, norsku húsin og þessar renndu súlur í
stofuveggnum ásamt fulningum í loftinu báru vitni um það:
Andinn í húsinu var annars allur á þann veg að maður
gat vel ímyndað sér að heimilisfólkið væri útivið í heyönnum og væri rétt
ókomið heim. Maður átti allt eins von á að húsfreyjan birtist í gættinni og
kallaði menn í kaffi og heimabakað, en - þegar betur var að gáð var
engin húsfreyja og eldavélin köld ....
Við gengum aftur út í góðviðrið. Kajakræðararnir voru
enn að leggja af stað úr Stofuvogi, einhverjir þeirra voru þó á vappi við
búðirnar.
Við hlið íbúðarhússins stendur þessi gamla skemma,
ótrúlega heilleg og bein þrátt fyrir að ytra byrðið sé orðið lúið. Kannski er
hún eftir allt í betra standi en íbúðarhúsið sjálft?
Eftir góða viðdvöl við húsin ákvað Sturla að nú væri
Sigurði fullborguð biðin í Ólafsey! Við gengum til baka niður á
grjóttangann þar sem bátarnir lágu og ég myndaði húsið einu sinni enn, nú með
viðbyggingunni:
Bænhússtraumur milli Öxneyjar og Seljalands við Brokey
er kenndur við bænhús sem fyrr á öldum mun hafa staðið í Öxney. Á hól milli
bakka Bænhússtraums og íbúðarhússins stendur lítil skemma, á mæni hennar er
negldur trékross en ég er nokkuð viss um að sá kross á lítið skylt við
helgi hússins, jafnvel þótt Sturla bóndi hafi kallað kofann "bænhúsið" um leið
og við gengum hjá. Mér sýndist hann reyndar glotta.
Bátarnir voru á sínum stað og við klifruðum um borð.
Nokkrum augnablikum síðar vorum við lagðir af stað út Bænhússtraum að nýju, nú
í heimátt til Stykkishólms:
Við vorum rétt lagðir af stað þegar þetta
"skýjageimfar" sveif yfir okkur, breytti svo um lögun og hvarf í einhverri allt
annarri mynd:
Heimferðin var tíðindalaus, enda nokkuð bein sigling
vestur um Breiðasund. Áætlunin, þó lausleg væri, hafði staðist í meginatriðum,
við höfðum aðfallið með okkur inneftir og nú á heimleiðinni fylgdum við bullandi
útfalli sem skilaði okkur aukamílu í ganghraða. Kannski munaði það ekki svo
miklu fyrir Gustinn, með sína glænýju 40 hestafla vél, en gerði sitt fyrir
Bjargfýling, sem knúinn var af tíu hesta BUKH. Mér fannst líða ótrúlega stuttur
tími þar til við vorum komnir útundir Skoreyjar. Þar var ákveðið að taka
krók inn á litla vík sem mun heita Höfn. Upp af henni er sumarhús,
hálffalið bak við kletta og hóla.
Síðustu myndir ferðarinnar voru teknar á þessum stað,
af vesturströnd Skoreyja.
Klukkan var alveg um hálffimm þegar við bundum bátinn
og bárum farangur á land. Öll þessi ógleymanlega ferð hafði aðeins tekið sex
klukkustundir - mér fannst það lyginni líkast en ekki varð deilt við klukkuna.
Ég kvaddi ferðafélagana sem höfðu gert þessa ferð svo
einstaka - þá sérstaklega sögumennirnir og frændurnir Sigurður
Bergsveinsson, Einar Sigurðsson og Sturla Jóhannsson - og endaði heimsóknina í
Stykkishólm á sama hátt og hún hófst, þ.e. í kaffi hjá Gunnlaugi Valdimarssyni
á Austurgötunni. Nú var margt breytt frá Rúfeyja/Rauðseyjaferðinni okkar í
júlíbyrjun, trillan Rúna farin vestur á Ísafjörð og Gulli bátlaus í fyrsta
sinn í áraraðir.
Fyrsta hluta frásagnar lauk við húsgrunninn í Ólafsey, þar sem fróðir menn
upplýstu okkur hina og rifjuðu um leið upp minningar tengdar staðnum. Meðal annars kom það fram að staðurinn var
Einari Sigurðssyni frá Gvendareyjum sérlega hugleikinn, því í íbúðarhúsinu í
Ólafsey var aðsetur farskóla sveitarinnar og þar naut Einar sinnar fyrstu
skólagöngu.
Eins og fram kom var húsið í Ólafsey tekið niður og efni þess flutt út í
Stykkishólm. Sigurður Bergsveinsson er hafsjór af fróðleik um ættir, tengsl og
staðhætti í Breiðafirði og meðal þess sem hann gaukaði að mér er virðingargjörð
hússins í Ólafsey. Kannski er eftirtektarvert að undir liðnum "Þægindi" er
talin "Miðstöðvarupphitun". Skyldi upphitun húsa í dag vera talin "þægindi"?
Það gætti vart vinds í Ólafsey meðan við stöldruðum
þar við, og Sturla hafði tekið að sér einsamall að halda bátunum kyrrum við steinhleðslu
í vörinni. Þó Sturla væri vel að manni þótti honum sögustundin orðin nokkuð
löng, þegar við hinir loks snerum til skipa, því það tekur í tvo þunga trébáta
þó aðeins sé örlítil gola, þegar straumsúgur sjávarins bætist við. Við
hröðuðum okkur um borð og lögðum frá landi. Nú lá leiðin norður fyrir Ólafsey
og þaðan til austurs inn milli eyjanna. Það er réttast að birta aftur
kortaklippuna sem sýnir svæðið:
Siglingaleið okkar lá milli Ólafseyjar og Stórhólma, á
þeim stað sem kallaður er Steinsund. Sundið er mjög þröngt, straumhart og í því
miðju er stór steinn sem fellur yfir á flóði. Nú hagaði þannig til að þótt
komið væri útfall úti á firðinum gerist allt miklu hægar í þrengslunum milli
eyja og skerja, og á þessum stað var sjórinn enn að streyma inn á
Hvammsfjörðinn. Það er þessi mismunur sem myndar hörðustu fallastraumana á
svæðinu, því þegar "sían" milli hólma og skerja hefur loks hleypt öllum þeim
sjó inn á Hvammsfjörðinn sem hún geymir í sér, er farið að falla út utan
eyjanna. Á auðum sjó gerist allt hraðar og þess vegna "flýr" sjórinn vestan
eyjanna miklu hraðar en sá sem geymdur er innan þeirra. Þegar sjórinn inni á
Hvammsfirðinum leggur loks af stað út á milli eyjanna aftur er
yfirborðshæðarmunurinn orðinn talsverður - mismikill þó eftir tunglstöðu- og
því myndast hreinir beljandar milli eyjanna. Stundum hefur verið talað um allt
að tveggja metra hæðarmun yfirborðs og straumhraða 16-18 hnúta í hörðustu
röstunum!
Það vill stundum vera ".hægara um að tala en í að
komast" og þannig fór mér þegar við komum í Steinsundið. Sigurður
stýrði Gustinum, Sturla stóð afturí og bandaði hendi til félaganna á
Bjargfýlingi til leiðsagnar um sundið. Þegar nær dró steininum í sundinu mátti
sjá straumröst af honum og það gerði okkur auðveldara með staðsetningu. Ég tók
hins vegar eftir því að straumurinn rann í öfuga átt - ég vissi að farið
var að falla út úti á Breiðasundi fyrir góðri stundu en straumurinn sem snerist
um steininn í sundinu var á innleið. Ég vakti máls á þessu og fékk ábendinguna
strax frá Sturlu - ég eiginlega hálfskammaðist mín fyrir að hafa talað af mér
því ég átti að vita þetta þó ég væri að sjá það með eigin augum í fyrsta
skipti.
Við runnum Steinsundið og
innan þess var lygna og hægari straumur. Það var komið fram yfir hádegi og
tilvalið að grípa til nestisins á þokkalega auðum sjó. Ég hafði tekið með mér
Árbók F.Í. frá 1989, sem er biblía áhugamannsins um Breiðafjarðareyjar og
reyndi að átta mig á þeim eyjum og hólmum sem fyrir augu bar. Það var
sannarlega ekki auðvelt og mér fannst hughreystandi að heyra að hinir voru ekki
hundrað prósent vissir heldur. Sjókortið í GPS tækinu
sýndi aðeins örfá eyjanöfn og lítið á því að byggja í þessu kraðaki eyja, hólma
og skerja. Svo náðu menn áttum.
Siglingaleiðin lá (og nú þarf að líta á kortið.)
sunnan Ytri-og Innri Helgeyja og um sundið milli þeirra og þar sem heitir
Hryggir. Síðan var beygt upp (norður) með Brokey austanverðri og, hafi mér ekki
skjátlast, siglt um sundið milli Brokeyjar og Húseyjar. Vaðalseyjar voru næstar
og um þær var siglt þegar þessi mynd var tekin til vesturs, í átt til
Norðureyjar:
Áfram var haldið og ég reyndi allt hvað ég gat að
halda þræðinum, lesa í árbókinni, skoða kort og greina eyjar frá skerjum. Ég
var niðursokkinn í gruflið þegar einhver kallaði: ÖRN!
Og örn var það sannarlega. Hann hafði styggst við
bátakomuna, flaug upp úr nærliggjandi eyju - mögulega var það ein Vaðalseyja -
og hnitaði stóra hringa yfir bátunum. Myndavélin var munduð og einum tuttugu
myndum hleypt af. Flestar urðu ónýtar en þessar lifðu:
Eftir nokkra hringi sannfærðist örninn um að engin
hætta stafaði af okkur og settist aftur í hólmann sinn. Við sigldum áfram í
hálfgerðum krákustigum vandrataða leið þar sem Sturla og Sigurður báru stöðugt
saman bækur sínar. Við kræktum fyrir Andey og vorum þar með komnir
nokkurn veginn á auðan sjó inn á sundið milli Arnareyjar og Gagneyjar.
Fjárbóndinn Sturla hafði tekið með sér riffilinn ef
ske kynni að tófa sæist í eyjunum. Engin sást tófan þó skimað væri víða, en
skyttan var engu að síður veiðileg með riffilinn:
Einn af harðari straumum á þessu svæði er Gagneyingur,
milli Gagneyjar og Galtareyjar. Á netsíðu kajakklúbbs má sjá ágæta
mynd af straumi í ham og m.t.t. staðhátta er myndin líklega tekin við Brattastraum, austan við Gvendareyjar. Kannski má af myndinni ímynda sér Gagneying í góðu formi. Þegar við sigldum inn milli eyjanna tveggja,
Arnareyjar og Gagneyjar og litum á strauminn virtist hann samt svona hálf
utangátta - það var að vísu fall um hann en þar sem smástreymt var, var
straumþunginn ekki nema svipur hjá sjón. Við runnum niður Gagneying á
þriggja, fjögurra mílna hraða, muni ég rétt - en reyndar með
frákúplað!
Á næstu mynd er siglt meðfram Galtarey, sunnan
hennar og til vesturs. Efst á eynni er trjálundur og fyrir miðri mynd má
greinilega sjá tóftir, iðgrænar og skera sig úr. Ef gluggað er í Árbókina
títtnefndu má lesa á bls. 98 að óvíst sé hvort föst búseta hafi verið í
Galtarey eða aðeins selstaða frá Öxney, sem eyjan heyrði áður undir. Hvort sem
er hefur verið þarna hús af einhverju tagi og búfé hefur gengið um, ef marka má
græna litinn. Í trjálundinum er mér sagt að sé jarðsett aska Guðrúnar Jónasdóttur úr Öxney, eiganda
Galtareyjar. Enginn hvílustaður hæfði þeirri öldnu heiðurskonu betur en þessi,
þar sem víðsýnið ríkti.
Vestarlega á Galtarey hafa eigendur, afkomendur
Guðrúnar reist sumarhús við lítinn vog:
Frá Galtarey var siglt í suðvestur, vestan Akureyjar
og til stjórnborða lágu Rifgirðingar. Á siglingunni sáum við þök húsa í Rifgirðingum
bera yfir hólmana nær okkur.
Á bakborða blasti svo við reisulegt íbúðarhúsið í
Brokey:
Eftir stutta
siglingu var snúið til vesturs og stefnan sett á Geysandasund, milli Öxneyjar
og Rifgirðinga. Á myndinni sér til húsa í Rifgirðingum:
Með því að
horfa til vesturs yfir Breiðasund og snúa tökkum á myndavélinni mátti sjá
sæmilega til húsa í Hrappsey:
..og væri
horft aðeins lengra til suðurs blasti Bjarnarhafnarfjall við lengst til vinstri
og í það bar Helgafell á Þórsnesi. Stykkishólmur er örlítið til vinstri við
myndarmiðju:
Við höfðum
Öxney á bakborða og sigldum meðfram þessu forna ættaróðali Sturlu bónda í
Ólafsey. Út úr eynni til SV. gengur Mjóanes eins og fingur sem bendir á
Ingeyjar, þar sem fé bóndans hefur vetursetu. Fyrir Mjóanes sigldum við inn á
Bænhússtraum, sjöunda straum ferðarinnar. Innan við Mjóanes skerst Stofuvogur
inn í Öxney, fyrir botni hans er íbúðarhúsið og má muna sinn fífil fegurri. Í
Stofuvog var einnig mættur ræðaraklúbburinn úr Gvendareyjum og hafði reist sér
búðir.
Hér ætla ég
að láta staðar numið að sinni. Í þriðja og síðasta hluta verður gengið á land í
Öxney og litast um við bæjarhúsin. Að því loknu heimsiglingin með krók við
Skoreyjar.
Tilefni pistilsins er, eins og áður var komið fram, að 365 Miðlar hættu rekstri tveggja bloggkerfa og lokuðu þeim. Þar með lokaðist inni gríðarleg a mikið efni frá mér enda um að ræða margra ára færslur um allskonar málefni. Á þá frásögn frá síðsumri 2011 sem titillinn vísar til, var tengt af netsíðu Bátasafns Breiðafjarðar og við lokunina varð tengillinn óvirkur. Mér tókst með góðri aðstoð að ná hluta efnisins til baka og þó ekki sé ætlunin að endurbirta allt efnið hér - sem varla er vinnandi vegur - þá birtist "Sjö strauma siglingin" þó aftur svo hægt sé að tengja að nýju.
Mig minnir að klukkan hafi verið um hálfþrjú
föstudaginn fimmta ágúst sl. þegar Sigurður Bergsveinsson hringdi. Hann setti
fram einfalda spurningu: Hvort ég væri búinn að
ráðstafa morgundeginum?
Ég var svo sem ekki búinn að fastnegla neitt, þó við
Elín Huld hefðum talað okkur saman um einhverja ferð á útilegubílnum. Það var
líka eins gott, því þegar Sigurður Bergsveinsson spyr hvort maður sé búinn að
ráðstafa morgundeginum - ja, þá býr eitthvað undir sem vert er að heyra meira
um. Og þannig var það líka. Sigurður og félagar höfðu ráðgert
siglingu frá Stykkishólmi um suðureyjar Breiðafjarðar í blíðunni sem aldrei
bregst á þeim slóðum. Þeir ætluðu á tveimur, jafnvel þremur bátum og hann vildi
gjarnan bjóða mér með á GUSTI sínum. Þegar maður fær svona boð er aðeins eitt
svar til, hvað sem líður öðrum plönum. Ég sagði já, jafn hátt og skýrt og væri
ég kona að játast Sigurði Bergsveinssyni fyrir altari!
Sá hluti Breiðafjarðareyjanna sem í daglegu tali er
kallaður suðureyjar er eyjaklasinn - eða eyjamorið - sem girðir Hvammsfjörðinn
þvert, allt frá Þórsnesi að sunnan að Klofningi að norðan. Ef nefna á helstu og
þekktustu eyjarnar má telja Brokey, eina stærstu eyju Breiðafjarðar, Öxney,
Gvendareyjar, Ólafsey, Purkey, Hrappsey, Klakkeyjar (toppana sem sjást víða að
enda hæstu eyjar í Hvammsfjarðarmynni) og utar liggja svo
Langeyjarnar tvær, efri og fremri, Arney, Bíldsey, Fagurey, Elliðaey og
Vaðstakksey. Mér skildist á Sigurði að ætlunin væri að sigla frá Stykkishólmi
inn undir Gvendareyjar og reyna að ná góðum hring meðan vel stæði á falli.
Siglingar um eyjasvæði Breiðafjarðar ráðast nefnilega meira af sjávarföllum en
nokkru öðru náttúruafli og laugardaginn 6. ágúst var háflóð í Stykkishólmi
klukkan sirka 11.40. Hugmyndin var að sigla af stað vel fyrir háflóð og fylgja
straumnum inn milli eyja. Ef allt gengi sem ætlað væri yrðum við svo á
útfallinu til baka.
Sigurður hafði orðað það að bjóða Gunnlaugi
Valdimarssyni Rúfeyingi með í siglinguna, Gulli er kannski ekki manna
kunnugastur á þessu svæði en kunnugur samt og hann hafði staðið eins og
víkingur við stýrið á RÚNU sinni gegnum Rúfeyjaröstina í byrjun
júlí, þegar Bátasafn Breiðafjarðar hélt sína árlegu hópsiglingu. Þegar ég svo
hringdi í Gulla til að færa honum boð Sigurðar var hann lélegur til
heilsunnar og treystist ekki í förina. Það var miður en varð ekki að gert.
Laugardagsmorgunninn 6. ágúst heilsaði með dýrlegu
veðri. Síðustu hrafnar næturinnar voru á heimleið og blaðberar á stjái þegar
lagt var af stað úr Kópavogi áleiðis í Stykkishólm. Allajafna tekur það
mig um tvo tíma að aka þessa leið, nú var fátt sem tafði og ég var kominn á
leiðarenda mun fyrr en ég hafði áætlað. Ekki þó nógu snemma til að ná Gunnlaugi
Valdimarssyni í bólinu, nei, sá gamli var á fótum og um eldhúsið á
Austurgötunni lagði kaffiilm. Heilsan hafði þó lítið lagast frá deginum áður og
Gulli ákvað endanlega að sitja heima. Þeir Sigurður og félagar höfðu
ákveðið brottför kringum tíu um morguninn og eftir dálítið bryggjuspjall þar
sem menn "hrærðu sig saman" voru bátar ræstir, farangri staflað og
endum sleppt.
(Mynd frá S.B.- Frá vinstri Einar Sigurðsson, Gunnar
Th, Þórarinn Sighvatsson formaður á litla Þyt í eyjasiglingunni 2.7.
sl. og maður sem ég man ekki nafnið á!)
Þeir voru tveir, bátarnir sem lögðu upp í
eyjasiglinguna þennan laugardagsmorgun. Á Gusti, þeim stærri vorum við fimm: Sigurður
Bergsveinsson formaður, ættaður úr Ólafsey og Gvendareyjum,HalldórBárðarson trésmiður
úr Mosfellsbæ, mágur Sigurðar, Sturla Jóhannsson hlunnindabóndi
í Ólafsey og strandveiði-trillukarl í Stykkishólmi, ættaður úr Öxney og
Gvendareyjum. Þeir Sturla og Sigurður formaður eru systrasynir. Fjórði maðurinn
var Einar Sigurðsson, fv. landsbókavörður, fæddur og uppalinn í
Gvendareyjum, móðurbróðir Sigurðar og Sturlu. Fimmti maður um borð var ég, alls
óskyldur og ótengdur en áhugamaður um allt áhugavert sem tengist
Breiðafjarðareyjum og það, ásamt því að vera brúkleg ballest, gerði mig
gjaldgengan um borð.
(Mynd frá S.B: Öxneyingurinn og Ólafseyjarbóndinn
Sturla Jóhannsson leggur línurnar..)
Hinn báturinn var Bjargfýlingur. Báðir þessir bátar, Gustur og Bjargfýlingur voru í
Rúfeyja/Rauðseyjasiglingunni þann 3ja júlí sl. Þá fannst mér eftirtektarvert hvað
Bjargfýlingur fór fallega í sjó, sama hvaðan aldan kom. Þessari litlu fleytu,
sem eitt sinn hét því stóra nafni "Grettir Ásmundsson"
fataðist hvergi, sama hvaðan aldan kom - ekki frekar en nafna hans forðum á
Drangeyjarsundinu. Í áhöfn á Bjargfýlingi voru þennan laugardag þeir Þorgeir
Kristófersson pípulagningameistari í Mosfellsbæ, ættaður úr Skáleyjum
og systursonur þeirra Jóhannesar, Eysteins og Ólafs Gíslasona. Annar var Jón
Helgi Jónsson, hlunnindabóndi í Purkey, búsettur í Stykkishólmi og sá
þriðji var Ari Björnsson, rafvirkjameistari í Borgarnesi.
Það er rétt að setja hér bút úr korti til að gefa
einhverja hugmynd um hvert siglt var. Í upphafi var siglingaleiðin ekki
fastákveðin en nokkrar hugmyndir höfðu menn þó til að fylgja.
Þegar komið var út úr höfninni í Stykkishólmi var
stefnan tekin austur fyrir Súgandisey og inn fjörðinn. Við sigldum rétt norðan
við skerið Baulu, og ég mátti til að mynda Bjargfýling á siglingunni:
Þórishólma ber í stýrishúsið á Bjargfýlingi, en á
stjórnborða stóð Baula upp úr sjónum, sakleysisleg að sjá en þó tengd landi með
hraunrana rétt undir yfirborðinu:
Frá Baulu var útsýnið svona inn fjörðinn. Álftafjörður
gengur inn í Skógarströndina til hægri en á miðri mynd gnæfa Staparnir og
Stóristapi þeirra langhæstur og tilkomumestur. Í eyju til vinstri má sjá hús,
þar sér til lands í Skákarey:
.....og væri litið um öxl bar Helgafellið í
Bjarnarhafnarfjall, þar sem sólin var að ryðja frá sér skýjaþykkninu:
Til vinstri handar (nú má ég ekki segja: "Á bakborða",
því kannski vita ekki allir hvað er "bak" og hvað er "stjór") runnu Seley og
vestan hennar hólminn Fagurey, hjá. Héðan frá séð virðist Fagurey áföst Seley
en svo er ekki:
Við renndum inn á leguna í Skákarey en höfðum þar ekki
frekari viðdvöl. Einn selur var þarna á bótinni, líklega var hann sjálfskipaður
landvörður, því hann stóð oftar en ekki hálfur uppúr sjó og rannsakaði okkur
gaumgæfilega. Ekki tókst þó að ná honum á mynd.
Við sigldum þröngt og grunnt sund sunnan við Skákarey,
innundir Stapana:
Að stuttri stund liðinni vorum við komnir innundir
Stórastapa. Sunnan og austan (innan) við stapann er Stapastraumur og um hann
ætluðum við:
Stuðlabergið í Stórastapa er hreint magnað, og þá ekki
síður stuðlahrúgan undir því:
Það sem virðast vera hús á Skákarey eru í raun
trjálundir:
Það er ekki skrýtið þó maður verði hálf-bergnuminn á
siglingunni um Stapastraum:
Það mun hafa verið einhversstaðar á þessarri
siglingaleið sem Sigurður formaður skipti sambyggðum GPS/dýptarmælinum yfir á
heila GPS mynd í þeim tilgangi að sýna mér eldri siglingaferil um þessar
slóðir. Ekki höfðum við lengi rýnt þegar skipun barst frá okkar helsta
leiðsögumanni, Sturla bónda í Ólafsey: "Hafðu myndina á mælinum!". Það
var auðvelt að átta sig á ástæðunni. Sturla er þaulkunnugur á þessum slóðum og
þekkti jafnt landið sem sást og hitt sem ekki sást - þ.e. sjávarbotninn. Hann
var ekki síður fjölbreytilegur en þurrlendið og það kom margoft fyrir að
mælirinn sýndi 12-18 metra dýpi, síðan kom lóðréttur veggur fram og dýpið varð
1,5 - 2 metrar. Örskömmu seinna kom aftur veggur og dýpið varð kannski 20
metrar eða meira - alveg magnað að sjá. Það gagnaðist okkur því lítið að hafa
dýpistölurnar einar á skjánum ef ekki var hægt að lesa botninn. Það sem eftir
var ferðar var tækið því stillt á tvískiptan skjá, hálfan GPS og hálfan
dýptarmæli.
Væri litið inn í Álftafjörðinn sýndist heldur vera að
létta til. Við vorum komnir inn úr Stapastraumi og okkur til hægri handar voru
Hrísey og Geitareyjar. Leiðin lá um strauminn Geiteying, milli Geitareyja og
Gvendareyja, en við vorum nálægt háflóði og straumsins gætti ekki nema að litlu
leyti. Vegalengdir milli eyja og eyjaklasa eru litlar og eftir stutta siglingu
um Geiteying vorum við komnir inn undir leguna í Gvendareyjum.
Ásta Eggertsdóttir Fjeldsted, verslunarkona á
Ísafirði eignaðist Gvendareyjar um miðjan fimmta áratug síðustu aldar og
afkomendur hennar eiga þær enn. Arngrímur, sonur Ástu og fyrrum blómasali
á Ísafirði hefur dvalið þar á sumrum og gerir ýmislegt sér til dægrastyttingar.
Þegar við komum undir heimaeyjuna hittum við Arngrím þar sem hann var við
smíðar í lítilli vík vestarlega á eynni.
Við heilsuðum, kynntum okkur og báðum um leyfi til að
ganga á land í vörinni við bæjarhúsin. Það leyfi var auðfengið, en heyra mátti
á Arngrími að lítið hefði farið fyrir leyfisbeiðnum hjá stórum hópi kajakræðara
sem sjá mátti álengdar við bæjarvörina. Honum var ekki um það gefið að fólk
færi valsandi um eyjuna í leyfisleysi - enda skiljanlegt. Við kvöddum svo
þennan iðjusama Ísfirðing og héldum innundir vörina, þar sem lítil, hlaðin
steinbryggja myndaði gott skjól.
Við lögðumst að steinbryggjunni og Bjargfýlingur
utaná. Í vörinni voru kajakræðarar að búast til brottfarar, þetta var sem fyrr
segir nokkuð stór hópur og Sturla bóndi gaf sig á tal við nokkra, hafði enda
áður gefið þeim leyfi símleiðis til að slá upp búðum á landareign sinni í
Öxney.
(Það var vel við
hæfi að mynda skipstjórann á breiðfirska súðbyrðingnum Gusti með plastspækjur
bakpokaferðalanganna í baksýn. Myndir frá S.B.)
Það má sjá af myndunum, hversu stutt er frá
Gvendareyjum til lands á Skógarströnd, og hér má einnig sjá haganlega
lendinguna í Heimaey Gvendareyja - allra átta skjól:
Við gengum upp á eyjuna og lituðumst um, enda útsýnið
hreint frábært í blíðviðrinu. Tveir úr áhöfn Bjargfýlings stilltu sér upp til
myndatöku, sá þriðji mundaði vélina (og sá fjórði myndaði alla þrjá):
Það er töluverð trjárækt í Gvendareyjum, eljuverk
genginnar kynslóðar standa lengur en mannfólkið, sem kemur og fer....
Einar Sigurðsson, ferðafélagi okkar fæddist í litla,
hvíta bæjarhúsinu árið 1933 og þó Einar væri hreint ekkert gamalmenni, hraustur
og fótléttur fannst mér hann yngjast um mörg ár við heimsóknina í eyjuna.
Þegar við
bjuggumst til brottfarar eftir ágæta gönguferð var mættur í vörina Páll bóndi í
Brokey. Hann var að sinna erindum við Arngrím og líta eftir öðrum eigum
Þessi einstaki klettaveggur ofan við lendinguna í
heimaey Gvendareyja er hreinlega eins og hlaðinn - einn eitt furðuverk
náttúrunnar sem svo endalaust er af á þessum slóðum. Myndin er tekin um
leið og Gusti var rennt út frá litlu steinbryggjunni og stefnan sett áfram inn
eyjasundin.
Við sigldum austur fyrir heimaey Gvendareyja. Eyjan
endar í háum klettahöfða en rétt austan hans eru Hjallseyjar. Litla-Hjallsey er
næst höfðanum og á milli er Brattistraumur, en um hann segir í Árbók F.Í. frá
1989 að hann sé einn harðasti straumurinn í öllu Hvammsfjarðarmynni. Orðrétt: "Hann
er þröngur og fremur grunnur með skeri í miðju og myndar á útfalli foss sem er
á annan metra að fallhæð" (bls 85). Á næstu mynd má sjá
kajakræðarana leggja upp frá Gvendareyjum og stefna norður Brattastraum:
(Mynd S.B.)
Höfðinn austast á heimaey Gvendareyja,
Brattistraumur er að baki vinstra megin á myndinni:
..og Bjargfýlingur fylgir á eftir gegnum Brattastraum,
sem þennan dag var í óvenju góðum ham enda sléttur liggjandi...
Framundan var straumurinn Stóri - Hjallseyingur,
grunnur og vandsigldur enda stóðu þarabrúskar uppúr sjónum á bæði borð.
Dýptarmælirinn var þó nokkuð stöðugur í hálfum öðrum metra og undir traustri
leiðsögn Sturlu runnum við örugglega inn á legu í Ólafsey.
( neðsta mynd S.B.)
Þeir frændur Sturla, Sigurður og Einar eru allir
nátengdir Ólafsey og hún varð því nokkuð löng, sögustundin við grunn
íbúðarhússins sem þar stóð. Reyndar gætti Sturla bátanna meðan við hinir gengum
á land, en þeir Sigurður og Einar uppfræddu okkur hina ásamt því að rifja
sjálfir upp liðna tíma:
(Neðri mynd S.B.)
Bærinn í Ólafsey hefur verið ágætt hús á sínum tíma,
vel byggt og reyndar svo vel að eftir að búsetu lauk var húsið tekið niður og
viðir þess notaðir í húsbyggingu úti í Stykkishólmi:
(Mynd frá S.B.)
Steyptur kjallarinn hafði hins vegar hvergi farið og
var ekki á leið neitt:
Einar Sigurðsson situr á grunni hússins í Ólafsey.
(Mynd S.B.)
Hér fyrir neðan má sjá hversu nálægt Ólafsey nútíminn
er kominn. Ætli síðustu ábúendum hefði ekki þótt munur að geta gripið gemsann
og hringt eftir hraðbát út í Hólm ef eitthvað vantaði - svosem Þorgeir pípara!
Það má einnig sjá bátana í vörinni í Ólafsey, hægra
megin við miðja mynd sjást húsin í Stykkishólmi og vinstra megin sér til húsa í
Gvendareyjum. Það er ekki vegalengdunum fyrir að fara, þó leiðir milli eyjanna
gætu verið erfiðar eða hreinlega ófærar og lífshættulegar í myrkri og
hörðum fallastraumum:
Hér ætla ég að slá botninn í fyrsta hluta sögunnar af
"Sjö strauma siglingunni", við höfðum lagt að baki Stapastraum, Geiteying,
Brattastraum og Stóra-Hjallseying en aðeins um þriðja hluta siglingarinnar.
Hafi einhver áhuga á að afla sér frekari upplýsinga um bátana Gust og
Bjargfýling má finna ágætar upplýsingar á síðu Ríkarðs Ríkarðssonar, Gustinn HÉR og BjargfýlingHÉR.
Á AIS-
kerfinu sé ég að Vestmannaeyjatogarinn Jón Vídalín var að leggjast að bryggju í heimahöfn fyrir nokkrum mínútum. Þá styttist í að félagi vélstjóri komi heim með sögur úr rallinu. Þeir á J.V. hafa nefnilega tekið þátt í Hafrórallinu undanfarnar vikur og mér skilst að sitthvað hafi gengið á. Þrátt fyrir slæma bilun í spili sem lagfærð var austur á Eskifirði, þá er seigt í þessum gömlu Japanstogurum........alveg lygilega seigt.
Í gærkvöldi komst ég yfir bunka af myndum frá árinu 1994, teknar við ýmis tækifæri. Þær eru misgóðar en inn á milli eru þónokkrar eigulegar sem ég hreinlega man ekki eftir að hafa tekið. Nú þarf að ræsa skannann.....
Ég er enn að kljást við "Sjö strauma siglinguna" sem minnst var á síðast. Þegar mér tekst að koma henni frá mér á mannsæmandi hátt mun hún birtast sem ein löng færsla og ætli menn að lesa alla ferðina með myndum í einu er eins gott að hafa nóg kaffi og meððí við hendina - svo er kort af Hvammsfjarðareyjum Breiðafjarðar eiginlega nauðsyn líka.
Hér við Höfðaborg er bjart, dálítið kalt og vindgjóla. Inni er hlýtt eins og venjulega.....
Það er strekkingsvindur úti,
heyrist mér. Hitastigið er rétt um núllið og það hefur ekki fallið snjór í nótt. Gintaras í næsta húsi er í hefðbundnum barningi við bílinn sinn, sem vegna eldsneytisins lyktar eins og Hamborgarabúllan þegar hann loks fer í gang.
Það er verið að sjóbúa Stakkanesið, og að þessu sinni er það búið undir stórátök. Eftir u.þ.b. mánuð verður það nefnilega sett á vagn og flutt út á land. Ég geri ráð fyrir að það verði komið á áfangastað vel fyrir páska ef veður leyfir. Ég ætla mér nefnilega að eyða páskunum úti á landi og tek Stakkanesið með mér. Þangað til þarf að dytta að einu og öðru. Strákarnir hjá GG-Sjósporti pöntuðu fyrir mig nýjan björgunarhring því sá gamli var kominn til ára sinna og orðinn ljótur. Nýr hringur kallar á nýjar festingar og þær þarf að smíða. Svo varð ég fyrir því óhappi að í fyrravetur lak vatn inn með framglugga stýrishúss og skemmdi beykihillu undir gluggunum. Hana þarf að skipta um nú þegar lekinn hefur veið lagfærður. Frammi í lúkar er 220 v. inverter sem ég hef notað til að hlaða síma og keyra fartölvu. Nú er ætlunin að vera með fartölvuna aftur í stýrishúsi og nota kortagrunninn í henni á siglingu ásamt gps-tækinu. Það kallar á 220 v. lögn frá lúkar aftur í stýrishús og aukahillu fyrir fartölvuna. Þessutan er ég búinn að smíða festingar á afturstefnið og ætlunin er að smíða skriðbretti. Þetta bretti verður stillanlegt á meðan ég er að finna út hvaða halli á því hentar best. Ef þessi tilraun gefur góða raun má af henni áætla sköpulagið á nýjum skut - þ.e.a.s. ef ég fer út í þessháttar stórframkvæmdir. Allar slíkar smíðahugmyndir grundvallast á því að verkið skili tilætluðum árangri í gangi og stöðugleika.
Nú fyrir síðustu jól lokuðu 365 Miðlar tveimur bloggkerfum sem ég hef notað gegnum tíðina, þ.e. Blog-central og Blogg.visir.is. Þetta var gert án nokkurrar viðvörunar eða ábendingar og olli því að mestallt efni áranna 2005 til hausts 2011 varð óaðgengilegt. Ég hafði samband við starfsfólk hjá 365 sem var allt af vilja gert til að hjálpa mér um efnið og hefur, þegar þetta er ritað útvegað mér allan texta af Blog-central kerfinu á geisladiski. Myndirnar skiluðu sér ekki en þær á ég að eiga til eða get útvegað aftur. Eitthvað dýpra er á texta og myndum af Vísisblogginu og af því hef ég ekkert fengið frá 365.
Svo var það í fyrradag (miðvikudag) að ég var snemma morguns að grufla á netinu í leit að ákveðinni mynd. Þá "poppaði upp" mynd úr gamalli bloggfærslu frá mér, sem skrifuð var í Blog-central kerfinu. Ég prófaði því kerfið og viti menn: Það var opið! Ég ræsti soninn og tölvumeistarann Arnar Þór samstundis út og saman lágum við einhverja klukkutíma yfir því að afrita allt efni af kerfinu, bæði texta og myndir, og færa það yfir á minnislykil. Að því loknu ræsti Arnar eitthvað netapparat sem mér skislt að heiti "Waybackmachine" og geymir afrit af netinu " i det hele.." Eftir augnabliksleit í apparatinu kom fram nokkurskonar bakaðgangur að Vísisblogginu þar sem mátti finna flesta færslur sem skráðar voru í það frá upphafi til enda. Þær færslur voru samstundis afritaðar líka og færðar á kubb. Nú hefur því tekist að endurheimta um 80% af efni þessarra ára sem nefnd voru ofar og nú myndi einhver unglingurinn klykkja út með "Hjúkkit...."
Breiðfirðingurinn / Skáleyingurinn Sigurður Bergsveinsson hringdi til mín á dögunum og spurði hverju það sætti að ekki sæist lengur færsla sem ég skrifaði síðsumars 2011 um siglingu milli suðureyja Breiðafjarðar, þ.e. Hvammsfjarðareyjanna. Á þessa færslu var nefnilega tengt af þekktri bátasíðu en tengillinn var óvirkur. Ég útskýrði fyrir Sigurði þennan óleik sem 365 Miðlar höfðu gert mér og lét fylgja að unnið væri að endurheimt skrifanna. Meðal þess efnis sem okkur Arnari tókst að ná gegnum "Waybackmachine" var einmitt þessi ferðapistill og það sem næst verður gert er að setja hann hingað inn með haus og hala - en vegna þess að ég geri ekki ráð fyrir að allir nenni að lesa þennan pistil alla leið hingað niður þá set ég stutta skýringu í haus ferðapistilsins þegar hann birtist.
....og nú ætla ég að fara að gera eitthvað af viti...........
(E.S: Hún Sigurbjörg, stóra systir mín sem stödd er á Ísafirði þessa helgina, á afmæli í dag. Ég veit hún fær köku.....)
Ég hef
ákveðið að hafa efnið í öfugri röð við fyrisögnina og byrja á Justin Timberlake. Ég vil taka fram að það eina sem ég veit um þennan Justin er að hann er tónlistarmaður á leið til Íslands og mun halda hér tónleika. Af því tilefni skilst mér að einhver útvarpsstöð (trúlega ein þeirra sem ekki er svona "öldungamiðuð" eins og Saga og Retro...) hafi efnt til samkeppni þar sem hlustendur áttu að skila inn sinni útgáfu af einhverju JT-lagi. Í vinning var svo upptökutími, geisladiskur og - ef ég fer rétt með - miðar á tónleikana.
Verslódaman mín, hún Bergrós Halla er JT aðdáandi nr. eitt - að eigin sögn - og hún settist niður með gítarinn og röddina sína. Með aðstoð vinkonu og gsm-síma tók hún upp lag sem mér skilst (það er margt í þessu sambandi sem ég verð að láta mér "skiljast") að sé vel þekkt. Upptökuna sendi hún svo inn á viðkomandi útvarpsstöð - og vann!
Ef tæknin bregst mér ekki má finna þessa upptöku "HÉR".
Ég var örugglega ekki gamall þegar ég las þetta máltæki í fyrsta sinn. Mörgum sinnum síðan hef ég séð það og heyrt en með árunum hefur mér sýnst að skilningurinn sem lagður er í máltækið sé nokkuð á reiki.
Þó nokkrum sinnum hef ég rekist á þá útleggingu að menntun sé varanlegri en matur og sé því að öllu leyti betri. Það verði aldrei hægt að éta góða menntun. Matur hverfi en menntun ekki. Ég hef ekki séð þessa útleggingu máltækisins útskýrða beinlínis á þann hátt heldur hef ég skilið hana af samhenginu - og það er ekki flókið að skilja samhengi jafn einfaldra hluta.
Sá skilningur sem ég hafði á þessu einfalda - og þó ekki - máltæki er sá að menntun, þ.e. bókvit, sé eitthvað sem enginn geti lifað á og því sé meira virði að leggja sig fram um öflun lífsviðurværis en að liggja í bókum. M.ö.o.: Þeir sem láta bækur lönd og leið en beita sér fyrir mataröflun, þeir muni lifa. Þeir sem liggi í bókum en gleymi hinu líkamlega fóðri muni þá væntanlega veslast upp og deyja drottni sínum - því ekki verði bókvitið étið til viðurværis.
Íslensk þjóð hefur lifað marga hörmungartíma. Það má nefna jarðelda, hafísár, jarðbönn af snjó og frosti, gæfta-og fiskleysi og þessutan allar sjúkdómaplágurnar sem gengið hafa yfir. Það þarf ekki mikið ímyndunarafl til að sjá hvað þeir sem börðust fyrir lífi sínu á þessum tímum settu í fyrsta sæti. Það var sannarlega ekki bóklestur!!
Ég er að ljúka lestri "Skútualdarinnar" eftir Gils Guðmundsson. Efst á bls. 202 í fimmta og síðasta bindi má lesa eftirfarandi:
"Aðaláherzlan var lögð á það, strax og börnin fóru að skríða á legg, að þau lærðu að vinna. Þau voru látin ganga að störfum með fullorðna fólkinu, strax og þau voru fær um að halda á áhöldunum, stúlkubörn jafnt og drengir; þær lærðu að slá sem þeir, og yfirleitt að ganga að hvaða verki sem var. Skóla heyrðu börnin ekki nefndan, og lærdómur var ekki að jafnaði gylltur fyrir þeim; en viðkvæðið hjá gamla fólkinu: "Bókvitið verður ekki látið í askana", heyrðu þau því oftar. Yfirleitt var þó börnum kennt að lesa; skrift og reikning var minna hirt um; kverið, altarisgöngubænir og nokkra sálma urðu öll börn að læra, ef þau áttu að ná fermingu. Eftir að börnin höfðu lært að lesa, var ábyrgðin þeirra að standa sig við ferminguna. Kverið gátu þau lært í hjásetunni á sumrin og við gegningar á vetrum" (tilv.l.)
Þessi texti hér að ofan er skrifaður upp veturinn 1943 eftir Sigurði Hrólfssyni skipstjóra frá Draflastöðum í Fnjóskadal. Sigurður var fæddur árið 1866, sama ár og Ísafjörður fékk kaupstaðarréttindi. Síðan er liðin hálf önnur öld og það má efalítið treysta því að sá skilningur sem Sigurður Hrólfsson lýsir á máltækinu sé sá upphaflegi og rétti.
......enda ætla ég að halda mig við hann, leggja frá mér Skútuöldina og nýta daginn í eitthvað skynsamlegt!
Hún Áróra mín hefur skráð nýja kveðju frá Mexíkó. Ef einhver vill heimsækja hana á síðuna þá er slóð bæði HÉR og svo í dálknum hægra megin undir neðsta liðnum: "Úrvals skrifarar"
Endalokin
nálgast óðfluga. Það er átjándi febrúar og ekki lifa nema tíu dagar af þessum stysta mánuði ársins. Hér í Höfðaborg gerist fátt markvert, það er helst að einhver líti inn í kaffi fyrri hluta dags en þrátt fyrir stopul innlit flýgur tíminn og endalok þessa febrúarmánaðar nálgast semsé óðfluga. "Skútuöldin" hans Gils Guðmundssonar telur fimm bindi og ég er hálfnaður með það síðasta. Ég ætlaði líka að ljúka "Íslenskum sjávarháttum" Lúðvíks í vetur en það er risaverkefni og verður því úr þessu að bíða næsta vetrar.
Af því síðasti pistill snerist að miklu leyti um neytendamál, þann ósið framleiðenda að merkja matvöru með síðasta neyslu/söludegi löngu fyrir raunverulegan "lokadag" og ég lofaði sögunni af sprauturjómanum í næsta pistli þá ætla ég að standa við loforðið og skrifa mig um leið frá því.
Síðla árs 2012 keypti ég þetta fína vöfflumix í Bónusbúð og bætti um betur með rabarbarasultu og sprauturjóma. Heim kominn skellti ég svo í eina hræru og bauð Bassa með mér, enda kunna fáir betur að meta vöfflur með sultu og rjóma en Edilon Bassi. Eftir baksturinn og eftirfarandi veislu áttaði ég mig á því að allt húsið angaði af smjörlíkis - vöfflubrælu og hét því með það sama að hér um sali yrðu ekki bakaðar fleiri vöfflur. Sultukrukkan tæmdist með tímanum þegar brauð rak á fjörur okkar Bassa en þrýstibrúsinn með rjómanum lá ósnertur inni í ísskáp. Á botni hans stóð "best before...." og dagsetningin 18.11.2012.
Ég vissi að hún Elín Huld var vön að henda svona brúsum fljótlega eftir að dagsetningin á botninum rann upp, alveg burtséð frá því hvort innihaldið var raunverulega ónýtt. Talan gilti hvað sem tautaði og raulaði. Þess vegna datt mér í hug að geyma nú brúsann eins lengi og ég gæti heyrt innihaldið hristast. Trúr tekinni ákvörðun hristi ég brúsann á tveggja, þriggja mánaða fresti og alltaf hreyfðist innihaldið. Ég gætti þess þó að taka hann aldrei út úr ísskápnum nema bara það augnablik sem hristan tók.
Uppi á vegg í Höfðaborg hékk til skamms tíma afar falleg mynd, að mér fannst. Þetta var stór mynd úr IKEA, meter sinnum einnogfjörutíu að stærð og myndefnið var ísjaki á suðurskautslandinu. Nágranni minn sá þessa mynd eitt sinn hjá mér og dáðist að henni. Þessi granni minn er góður maður og því lofaði ég honum að að yfirstöðnum skipulagsbreytingum í Höfðaborg skyldi hann fá myndina að gjöf, þar sem hún samrýmdist ekki nýjum arkitektúr staðarins. Tíminn leið og í fyllingu hans færði ég granna myndina og fékk að launum köku eina heilmikla, kringlótta með þykku brúnu kremi og fleira skrauti. Kökuna átti granni í frysti enda var líkt á komið með henni og þrýstirjómabrúsanum - hinsti dagur var upp runninn fyrir nokkru síðan. Ég setti kökuna í frystinn minn enda áleit ég hvorugum okkar Bassa hollt að hakka í okkur heila súkkulaðitertu í einu. Þegar súkkulaðitertur eru annarsvegar erum við nefnilega jafn óstöðvandi báðir tveir. Allir hafa jú sína veikleika!
Svo kom fólk í heimsókn. Það var engin forsetaheimsókn, bara svona venjuleg kunningjaheimsókn en þeir voru semsagt fleiri en einn og fleiri en tveir í það skiptið. Ég sótti súkkulaðibombuna í frystinn og þíddi hana í örbylgjuofninum. Skellti henni á borðið ásamt tilheyrandi amboðum fyrir mannskapinn og sótti þrýstirjómabrúsann sem samkvæmt áletrun á botni hafði mætt sínu skapadægri fjórtán mánuðum áður. Ég bað nærstadda að rétta fram fingur, sprautaði ögn á hvern og spurði um leið með tilhlýðilegum áhyggjusvip: "Ereddeggi í lagi?" Jú, allir luku lofsorði á sprauturjómann enda hélt ég brúsanum fyrir mig og þar með "skapadægrinu".
Þegar yfir lauk lágu tveir þriðju hlutar kökunnar í valnum og meginhluti rjómans einnig. Þegar gestirnir höfðu lokið tilætluðu lofsorði á veitingarnar áræddi ég að sýna botninn á brúsanum. Þá var enda of seint að snúa við blaðinu, fjölskipaður dómurinn hafði jú eftir bragðprófun dæmt rjómann í fínu lagi - sem hann jú var.
Aftur fór brúsinn inn í ísskáp til áframhaldandi geymslu en aðeins í nokkra daga þar sem við Bassi stóðumst ekki mátið, vitandi líka af kökuþriðjungi á diski í skápnum. Næst þegar andinn kom yfir okkur renndum við í okkur bitanum vel "rjómuðum" og það stóðst á endum að þegar kökudiskurinn var hroðinn var aðeins lögg eftir í þrýstibrúsanum. Þar með fór hann í ruslið, hálfum fimmtánda mánuði eftir merkt skapadægur, en að manni sótti enn og aftur þessi hugsun um heil og óskemmd matvæli sem hent er á haugana til að hægt sé að selja auðtrúa sálum meira og meira og meira..........
Áróruengillinn minn er nú búin að vera heilan mánuð í Mexíkó. Nýkomin út setti hún upp bloggsíðu til að leyfa þeim sem heima sitja að fylgjst ögn með því sem á dagana drífur. Hún vinnur sjálfboðastarf á barnaheimili og er, að mér sýnist, í essinu sínu á þeim vettvangi. Meðal þeirra sem heima sitja er kærastinn Stefán og það var alveg eftir henni Áróru að velja -ÞESSA-slóð á síðuna sína.
Endilega heimsækið Áróru á síðuna hennar. Hún hefur bara gaman af því!
.....og ekki
fékk ég að fara til Eyrarbakka. Mér er samt alveg sama, svona þannig séð. Ég hef oft komið til Eyrarbakka og m.a.s. borðað í Rauða húsinu - heitir veitingastaðurinn það ekki annars?
Já, það er nefnilega þetta með veitingar. Ég er frekar nýtinn og hendi engu fyrr en orðið er dagsljóst að það er annaðhvort búið eða ónýtt. Svo er hitt að upp á nýframsóknarmennsku eru "búið" og "ónýtt" ákaflega teygjanleg hugtök!
Nú kemur saga:
Einu sinni - nánar tiltekið nákvæmlega fyrir ári síðan - keypti Áróra mín mjólkurfernu. Þetta var svona vítamínbætt mjólk, þið vitið, þessi í háu hvítu fernunum með tappa og rauðu/gulu skrauti. Ókei, fernan var stimpluð með framleiðsludag þriðja eða fjórða febrúar 2013 og síðasta sölu/neysludag (man ekki hvort) þann fjórtánda sama mánaðar. Áróra mín drakk hluta innihaldsins en þar sem hún sást lítið hér heima vegna anna á ástarvöllum dagaði fernan uppi í ísskápnum mínum. Ég segi "dagaði uppi" og á þar við að hún einfaldlega rann út og þarf ekki að skýra frekar.
Ég skipti mér ekkert af því sem Áróra mín átti í ísskápnum nema það væri farið að lykta sérstaklega illa - nokkuð sem sjaldan eða aldrei gerðist. Áróra mín er hins vegar svona dagstimplakona og snertir ekki mat sem kominn er fram yfir síðasta dag. Ekki einu sinni korter yfir. En vegna þess að Áróra var jafn sjaldséð hér heima og hvítur hrafn fékk fernan að vera um kyrrt í ísskápnum. Ég skal þó viðurkenna að ég gaf henni (fernunni) hornauga öðru hverju ef ske kynni að hún færi að þrútna og sprengihætta að myndast......
Maður er nefndur General Bolt-on. Auðvitað heitir hann allt annað en það skiptir ekki máli hér. Það sem skiptir máli er það að General Bolt-on kemur oft í heimsókn og þiggur þá gjarnan kaffisopa með mjólk. Nú gerðist það að generállinn kom í eina af heimsóknum sínum og G-mjólkin mín var búin. Þegar allt virtist stefna í óefni datt mér fernan með vítamínbættu mjólkinni í hug.
Hafandi í huga að það var komið fram í apríl mætti kannski ímynda sér að vítamínbætta mjólkin hefði breyst í eitthvað allt annað en vítamínbætta mjólk á þessum langa tíma sem liðinn var frá síðasta neyslu/söludegi (man enn ekki hvort). Ég mátti samt til að prófa og án þess að nefna aldur fernunnar við generálinn hellti ég örlítilli lögg í glas og bragðaði sjálfur á - þó það nú væri!
Mjólkin var algerlega óskemmd! Generállinn fékk útí kaffið (enn öldungis grandalaus um aldur vökvans) og ég skrúfaði tappann á að nýju og lét fernuna inn í ísskáp til seinni tíma rannsókna. Ekki löngu síðar kom kona í heimsókn - reyndar mamma hennar Áróru minnar - og ég lét hana bragðprófa mjólkina án þess að geta nokkuð um aldur hennar fyrr en smakkarinn hafði kveðið upp sinn úrskurð: Fínasta mjólk!!
Á þeim tímapunkti hafði ég yfir frumsamda en eldheita ræðu um sóun matvæla, vitlausar dagstimplanir og enn vitlausara fólk sem henti útrunnum mat án þess að svo mikið sem smakka á honum. Að vissu marki náði ég eyrum áheyrandans enda voru aðeins tvö eyru að hlusta og ég sá til þess að hljóðið bærist þeim báðum vel og tryggilega. Ég man að ég lauk ræðunni á þann veg að nú skyldi fernan geymd áfram í ísskápnum allt þar til innihaldið yrði sannanlega ónýtt - hvenær sem það yrði. Ég gældi við þá hugmynd að halda lífi í mjólkinni til maíloka en áður en sá tími kom hafði generállinn áðurnefndi komið í heimsókn oftar en einu sinni og jafnan fengið mjólk úr fernunni í kaffið sitt. Það var því aðeins gutlandi eftir í henni í kringum tuttugasta maí þegar Kristmundur í Stálveri kom í kaffiinnlit og þar sem hann er mjólkurdrengur eins og generállinn fékk hann síðasta dropann úr fernunni í kaffið sitt. Það fékkst því aldrei almennilega á hreint hversu lengi vítamínbætta mjólkin hefði getað lifað í fernunni í ísskápnum mínum.......
Þegar hingað er komið sögu vil ég leyfa fólki að gera sínar eigin tilraunir á sinni eigin mjólk. Það má svo birta niðurstöðurnar hér á síðunni ef fólk vill. Svo á ég alveg eftir að segja söguna af þrýstibrúsarjómanum......