Gunnar Th.
Fjórða kerfið.....


Færslur: 2014 Desember

31.12.2014 16:07

Vatn og brauð.


 Nei, það er hvorki vatn né brauð á matseðlinum í kvöld - og heldur ekki á morgun. Í kvöld er steiktur sauðfjárafturfótur á borðum, ásamt tilheyrandi meðlæti. Ég veit ekkert hvað er í matinn á morgun en hitt veit ég að síðan hallar öllu í áttina að vatni og brauði. Margt hefur mér verið misgjört um ævina en fátt líkt því sem Krónan gerði nú - að auglýsa 50% afslátt af öllu konfekti! Auðvitað fór ég á stúfana og miðað við það magn sem ég keypti er líklegt að konfektbirgðir Krónunnar hafi verið þrotnar vel fyrir hádegi.

U.þ.b. tvær klukkustundir af morgninum fóru í allsherjarleit að Edilon B. Breiðfjörð sem gerði mér, eiganda sínum þann grikk að stinga af frá skoðunarstöð Aðalskoðunar í Skeifunni í morgun. Þangað fór ég til að færa fyrrum vinnufélögum einn af konfektkössunum úr Krónunni en Bassi, sem átti að sjálfsögðu að fá mola notaði tækifærið um leið og honum var hleypt út úr bílnum og hvarf "med det samme". Ég leitaði árangurslaust um allt hverfið og víðar en tveimur tímum síðar hringdi  10-11 ára gutti úr Ljósheimunum og sagðist vera með óskilahund heima hjá sér. Ég varð óskaplega feginn að Bassi skyldi vera heill á húfi enda er slíkt ekki sjálfgefið í þessu umferðarþunga hverfi. Um leið og ég sótti hann fékk guttinn andvirði lítils flugeldapakka í staðinn fyrir pössunina. Bassi var hins vegar ekkert á því að koma með mér því fjölskylda guttans átti Labradortík sem var lóða en hafði verið úti á göngu með honum þegar Bassa bar að. Guttinn kom því heim með tíkina sem bar Bassa eins og frímerki á bakinu. Ekki orð um það meira!

Ég ætla ekki að strengja nein áramótaheit - önnur en þau að haga mér vel gagnvart öllu mínu fólki og öðrum líka. Komandi ár er óskrifað blað og óræðnara en flest önnur að því leyti að nk. mánudag klæðist ég nýjum, sérmerktum vinnugalla. Þar með hefst nýr kafli - og satt að segja dálítið spennandi, held ég. Allt um það síðar.

Skotturnar mínar hafa báðar samskonar smábíla til umráða, aðeins liturinn greinir á milli og báðir eru í minni eigu. Annar þeirra styttist eilítið í gærmorgun en allt var þó slysalaust og dældir og skrámað lakk spillir ekki áramótagleði. Þessi klausa er heldur ekki sett hingað inn "landsmönnum" til upplýsingar heldur sem söguleg heimild fjölskyldunnar þegar fram líða stundir.

Það líður á þennan síðasta dag ársins og sturtan bíður. Svo kemur nýársdagur, svo föstudagur og síðla þann dag ætla ég að leggja land undir hjól og aka einu sinni sem oftar upp í Stykkishólm. Það verður þá fyrsta ferðalag ársins 2015 en vonandi ekki það síðasta. Ég ætla að klappa Stakkanesinu dálítið um helgina en leiðin liggur svo suður aftur á sunnudagseftirmiðdegi. Að morgni ný vinna.........

Að síðustu: Örlítið minningarbrot um það sem eitt sinn var. Hér eru þeir Moli og Kisi undir jólatrénu á Lyngbrekkunni fyrir átta árum. Húsið á Lyngbrekkunni stendur enn, í annarra eigu þó.  Jólatréð og dýrin eru undir mold en minningin lifir.



Gleðilegt ár og gangið hægt um gleðinnar dyr.........

26.12.2014 11:38

Annar jóladagur.






(ég veit að myndin er ekki hefðbundin jólamynd en þar sem hún er tekin aðeins nokkrum dögum fyrir jól má ég til að birta hana. Jólin eru nefnilega líka hátíð dýranna, a.m.k. fá þau Sulta og Bassi ekki hamborgarhrygg eða hangikjöt aðra daga. Hún Sulta hefur stækkað talsvert eins og sjá má ef litið er á niðurlag ÞESSA pistils)

------------------------------------------------------------------------------------------------

Það er annar í jólum og ekki komið hádegi. Úti heyrast vindhljóð og stöku sinnum vottar fyrir éli á þakgluggunum í Höfðaborg. Ég hef ekki aðgang að framgluggunum því sonurinn er enn sofandi en þegar ég hleypti Bassa út í morgun sá ég að það hafði snjóað dálítið. Við þáðum jólaboð í gærkvöldi og þegar heim kom var Grandinn tekinn á hús, svona til að hlífa nýjustu bónumferðinni. Hann er því þurr og hlýr hér niðri. Hrossadráparinn svarti, sem nú er eign sonarins, fékk einnig sína bónumferð í gær og glansaði eins og forsetabíll á leið í jólaboðið.

( Já, við fórum tveir á tveimur bílum! Slíkt er auðvitað ekki hagræðing en óumdeilanlega mikið hagræði - fyrir okkur)

........og nú er mér boðið í jólabröns á eftir úti í bæ. Boðinu fylgir það skilyrði að ég mæti með borvél og tilheyrandi dót til að leggja loftnetskapal.

Svo er boðið til stórveislu úti í bæ í kvöld. Ég hef ekki ákveðið hvort ég fer. Finnst eiginlega komið nóg af ofáti í bili.

Skiljiði nú hversvegna hér í Höfðaborg er að finna eina eldhúsið á landinu sem enga hefur eldavélina?

Ég þakka þeim þremur sem sendu mér jólakveðu undir Þorláksmessupistlinum - og auðvitað öllum hinum sem í hógværð létu það vera en lesa samt - innlitatölurnar ljúga ekki.

Tíminn líður og ég þarf að taka til borvél og hæfilegan bor. Eigið öllsömul góða jóladaga!

23.12.2014 07:49

Þoddlákur.


 Það er Þorláksmessumorgunn, í Höfðaborg er stilla og hlýtt miðað við veðurspár undanfarinna daga. Þegar við feðgar gengum til náða í gærkvöldi hvein óvenjulega mikið í vatnskerfinu og ég gekk um allt til að leita að leka. Ekki fannst hann hjá mér. Í morgun var ég vakinn eldsnemma af veghefli sem fór hér um götuna og fræsti upp þykkan klaka. Þá tók ég eftir því að enn hvein í vatninu. Bassi bað um sína venjubundnu morgungöngu og fékk hana. Þá tók ég eftir vatnstaum eftir götunni. Þar með var skýringin komin. Nágranni minn hefur sumsé vakað í alla nótt við að bræða klaka úr stæðinu sínu og er enn að. Við götubrúnina er nú um 20 cm skör framan við stæði okkar hinna þar sem þykkast er og hefillinn fór um.......

Það hefur lítill tími gefist til jólaundirbúnings er þó er flestu lokið og það sem eftir er telst smálegt. Nú er einblínt á veðurspá "millidaganna" því stefnan hefur verið sett á Stykkishólm þar sem stórskipið Stakkanes á að fá dálítið jólaklapp.

Klukkan er að verða átta og leiðin liggur niður í Suzuki umboðið í Skeifunni. Ég er með smáverkefni í höndunum sem þarfnast úrlausnar fyrir jól. Það á að hafast ef vel gengur....

.....og nú er komið fram um hádegi og ég má til að bæta örlitlu við pistilinn: Á miðjum morgni, þegar ég stóð hér utan við Höfðaborgina með hendur í vösum, nefið upp í loftið og andaði að mér veðurblíðunni, rak ég augun í tvo starfsmenn Orkuveitunnar sem voru að hita upp hlemm í götunni - líklega til að geta opnað hann. Þeir voru svona tuttugu metra frá mér á aðra hönd en á hina höndina í sömu fjarlægð var nágranninn enn með heitavatnsslönguna að bræða klakann úr innkeyrslunni sinni (sem er nokkuð stór). Ég fylgdist með þeim hvorum í sínu lagi stutta stund en brá mér svo af bæ álíka stutta stund. Þegar ég kom aftur var granni á tali við Orkuveitumennina. Ég gerðist fluga á vegg og komst að því að einhver neðar í hverfinu hafði í morgun látið vita um heitavatnsleka, þar sem ylvolgt vatn rann í taum undan klakaskör. Ekki hafði sá reynt að finna upptök lekans heldur hringdi beint í Orkuveituna og tilkynnti bilun. Orkuveitan sendi tvo algallaða sérsveitarmenn á bíl (einum bíl þó) á staðinn og þeir hófust handa við að losa áðurnefndan hlemm í götunni - taumurinn rennandi tvo metra frá þeim og granni með slönguna í 35-40 mtr. fjarlægð að bræða klakann!

Sérfræðingarnir virtust því hafa eytt drjúgum tíma í vangaveltur um upptök lekans þegar þeim hugkvæmdist að snúa höfðinu örlítið og "uppsprettan" blasti við.

Líklega hefði sá sem tilkynnti lekann getað sparað OR útkallið ef hann hefði lagt á sig svo sem tuttugu metra labb upp á móti brekkunni til að leita upptakanna.

........en til þess þarf bæði líkamsorku og það sem sjaldgæfara er: Hugmyndaflug!



16.12.2014 22:42

Það habbðist fyrir rest...


 Er kominn heim í Höfðaborg eftir rokk og ról í Herjólfi. Hefði samt getað verið verra og mig grunar að þeir sem komu út til Eyja með fyrri ferð í dag móti suðaustanstormi hafi verið búnir að fá nóg eftir langa siglingu á hálfri ferð. Okkar brottför seinkaði um tvo tíma en svo var siglt á lensi með venjulegum hraða upp í Þorlákshöfn. Það var rétt búið að opna Þrengslin og Hellisheiðina og það merkilega var að þar uppi var ákaflega lítinn snjó að sjá - vandræðin í dag hafa líkast til aðallega verið vegna blindu en ekki beinnar ófærðar.

Í augnablikinu er bloti en veðrið á að snúast til harðar suðvestanáttar í nótt. Það er semsagt nóg eftir af illviðrum og ófærð.

Það eru ekki alltaf jólin, sko.......

15.12.2014 10:30

Enn fjör í Eyjum!


Það er kominn mánudagsmorgunn og það er kalt úti. Ég hef raunar engan hitamæli en ég sé kuldann út um gluggann - og svo hef ég netið. Veður.is segir fjögurra stiga frost hér í Eyjum en það er vindbelgingur og virkar því mun kaldara. Það var andskoti kalt að hlaupa út í heitu potta sundlaugarinnar í gær en hlaupið var þess virði og það tók sirka klukkutíma að hita sig svo í gegn að maður væri farinn að hlakka til kælingarinnar á leið inn í klefana aftur!

Eftir laugina var litið inn í Eldheima. Þar var fámennt, afar fámennt. Við vorum einu gestirnir það síðdegið og enduðum heimsóknina á fróðlegu og góðu spjalli við safnstýruna. Skoðunarferðin um safnið er hreint mögnuð og allir sem heimsækja Eyjar ættu að setja ferð í Eldheima á oddinn. 

Það var bjartviðri í gær en sem fyrr segir bæði kalt og vindasamt. Við ætluðum okkur að ganga bæinn þveran og endilangan eftir Eldheimaferðina en gáfumst fljótlega upp og héldum okkur við bílinn. Þessi mynd hér að neðan er raunar tekin á föstudaginn rétt eftir komu og þarna er nær snjólaus bær. Það átti eftir að breytast.









Myndirnar hér að neðan eru teknar eftir sundlaugarferðina í gær, sunnudag. Það hefur hressilega bætt í snjóinn þótt ekki hafi verið um neina ófærð að ræða - ekki nema þá á stöku stað fyrir vanbúna bíla.





Kirkjugarðurinn er einstaklega fallega skreyttur - eins og raunar bærinn allur. Myndavélin mín er hins vegar hvergi nærri nógu góð þegar þarf að mynda við takmörkuð birtuskilyrði og þessar myndir hér að neðan eru þær skárstu úr fjölda mynda sem teknar voru yfir garðinn og nágrennið.








Það er semsagt kominn mánudagur og ágætt veður þrátt fyrir vind og frost. Við eigum heimferð með Herjólfi síðdegis á morgun, þriðjudag. Veðurspá fyrir þann dagshluta er afleit, spáð er suðaustan stormi. Ef Herjólfur fer ferðina á annað borð verðum við líklega snögg til Þorlákshafnar, með hávaðarok og sjógang í rassinn!

Ég er samt að hugsa um að hafa vaðið fyrir neðan okkur og kaupa aukadag í orlofshöllinni við Heiðarveginn............


.................

13.12.2014 21:26

Fjör í Eyjum!


Það er laugardagskvöld í Eyjum - eins og víða annarsstaðar - og þrátt fyrir slæmt útlit er enn hægviðri. Siglingin út með Herjólfi í gær var líkust því sem siglt væri á lygnum polli. Hér er snjólaust að kalla og aðeins þunnur klaki á gangstéttum. Orlofsíbúðin sem ég tók á leigu var óhrein eftir síðustu leigjendur og fyrsti klukkutími frísins fór í að þrífa hana og henda rusli sem skilið hafði verið eftir fyrir næstu leigjendur. Þetta var ekki á planinu en varð þó að vera þannig.

Eftir þrifin fundum við okkur prýðilegan veitingastað, Vöruhúsið, og borðuðum kvöldmat þar. Ákaflega notalegur staður, hlýr, hreinlegur og maturinn góður. Svo tókum við okkur bíltúr í gærkvöldi, renndum flestar götur bæjarins og skoðuðum jólaskreytingar. 

Íbúðin er á efri hæð í tvílyftu steinhúsi nærri höfninni og við höfðum veitt því athygli að á neðri hæðinni er pöbb. Við vorum eiginlega rétt að jafna okkur á aðkomunni í íbúðina og búa okkur undir rólegt kvöld þegar á neðri hæðinni upphófst hreint hrikalegur djöfulgangur. Ég veit ekki hvort það sem þar fór fram átti að heita "lifandi tónlist" en hitt veit ég að ekki var spilað heilt lag allan þann tíma sem húsið nötraði af bassatónum. Það voru aðeins einstaka hljómar sem slegnir voru og þeir voru vandlega skrúfaðir upp á hæsta styrk. Innanum mátti kannski með góðum vilja greina brot úr þekktum lögum en ég giska á að höfundarnir vilji lítið af þeim flutningi vita. Kannski var einhver innandyra sem hafði gaman af spilverkinu en mér er nær að halda að þarna hafi frekar verið stillt upp rafmagnshljóðfærum fyrir húsgesti að glamra á - tón"listin" bar ekki með sér að þar slægju vanir menn strengi.

Þessi djöfulgangur hélst linnulaust til kl. 01 og eftir það tók við sundurlaus tónlist "af nálinni". Húsgestir, sem virtust flestir eða allir hafa smurt sig rækilega með söngolíu, færðust út fyrir dyr ( en höfðu raunar verið þar meira og minna reykjandi í skotinu þar sem gengið er upp í "orlofs"íbúðina) og ef marka mátti ópin og öskrin voru menn ekki á eitt sáttir um eitthvað. Við í íbúðinni fengum að njóta nærveru þessarra öskrandi húsgesta fram yfir hálftvö en þá fór að draga úr og um tvöleytið var loks hægt að skríða til bóls.

Ég skil ekki alveg í mínu annars ágæta stéttarfélagi, að bjóða félagsmönnum sínum upp á aðra eins "orlofs"íbúð. Við hefðum getað verið með börn, við hefðum getað verið með gamalmenni og við hefðum jafnvel getað verið gamalmenni sjálf. Hvernig dettur einhverjum í hug að leigja orlofsíbúð - stað þar sem gera má ráð fyrir að fólk komi á til að hvílast - uppi yfir pöbb þar sem framleiddur er annar eins hávaði og boðið var uppá í gærkvöldi?

Á tímabili í gærkvöldi vorum við alvarlega að hugsa um að taka ekki okkar dót upp úr töskum heldur þrauka nóttina -jafnvel í bílnum -,mæta fyrst allra á Herjólf í morgunsárið og yfirgefa þessa hörmung fyrir fullt og allt. Það varð semsagt ekki úr og hér erum við enn. Klukkan er nú rétt að verða tíu að kvöldi og mun rólegra á neðri hæðinni en í gærkvöldi. Við borðuðum kvöldmat öðru sinni í Vöruhúsinu og umsögnin er samhljóða gærkvöldinu - ein fata af stjörnum.

Dagurinn var annars fínn. Dálítil slydda í morgunsárið sem breyttist í rigningu þegar á leið. Kuldagallinn varð eftir heima í Höfðaborg svo ég fann ágæta fatabúð hér og keypti mér flottar, vatns-og vindheldar hlífðarbuxur. Nú má gera hvaða skítvirði sem er. Ég er klár í allt!

Svo rakst ég inn á lítinn stað þar sem nokkrir áhugamenn ræða áhugamál sín í víðasta skilningi. Sú heimsókn tók drjúga stund og mikið kaffi var innbyrt.

Spáin er semsagt í verra lagi en það má búast við framhaldi á þessum Eyjafréttum annað kvöld ef við verðum þá ekki fokin á haf út.......

Í nýju hlífðarbuxunum ætti ég raunar að geta fokið skammlaust til Færeyja og heim aftur án þess að blotna eða kólna.


..........þrátt fyrir allt er gaman og fínt fólk hérna í Eyjum.......


12.12.2014 08:15

Rauða serían.


Í niðurlagi síðasta pistils nefndi ég seríubarning. Haukur Sigtryggur á Dalvík skrifaði stutta athugasemd undir pistilinn og sagðist ekki hafa staðið í neinum barningi við sína seríu - hann hefði einfaldlega hent henni og keypt nýja.

Það var þá sem ég áttaði mig á að seríusagan er eiginlega hálfgerð jólasaga, svona eins og þær voru sagðar í gamla daga.

Þannig var að rétt fyrir síðustu mánaðamót var ég að henda rusli í Sorpu. Það hefur alltaf verið minn veikleiki að sjái ég eitthvað eigulegt í annarra rusli á ég til að reyna að nappa því og smygla því út svo lítið ber á. Þannig hefur margur hluturinn farið heilan hring, þ.e frá eigandanum í Sorpu, þaðan heim með mér og síðan aftur í Sorpu þegar ég er þess fullviss hann sé sannarlega ónýtur......

Um leið og ég fleygði mínu rusli í gám sá ég hvar ofan á öðru lá tuttugu ljósa sería í plastgrind. Þetta var sería með rauðum perum sem voru heldur stærri en aðventuljósaperur, eða s.k. E12 perur. Allar perurnar voru í skorðum í plastgrindinni og frágangur seríunnar eins og hún væri ný og ósnert. Um leið og ég henti rusli með hægri hendi kippti ég seríunni til mín með vinstri og lagði hana inn í bíl. Þetta var nefnilega mjög áhugavert - hver hafði fyrir því að ganga frá ónýtri seríu í plastgrind áður en henni skyldi hent?

Sjálfur hafði ég svo sem engin not fyrir seríuna enda Höfðaborg ekki jólaskreytt að utan. Mig langaði bara að sjá hvað væri að og hvort ekki væri hægt að laga það. Eftir að hafa fjarlægt allar perurnar og mælt þær fann ég sex ónýtar af tuttugu. Þessutan voru nokkrar fatningar illa farnar af spanskgrænu. Þær fjórtán perur sem heilar voru setti ég í box og svo allt saman niður í skúffu. Í byrjun vikunnar átti ég leið í Húsasmiðjuna og rak þá augun í samskonar seríur á útsölu. Á hillunni stóð: Vara hættir - 25% afsláttur.  Ofan við seríurnar voru pakkar með varaperum. Í hverjum pakka voru þrjár perur og útsöluverðið var 599 krónur. Ég leitaði að réttu perunum en fann aðeins einn pakka með rauðum - þeir fáu pakkar sem til voru af E12 innihéldu allir litabland eða glærar. Ég keypti þessar þrjár útsöluperur og hugsaði með mér að hinar þrjár hlyti ég að fá hjá svörnum samkeppnisaðila -  BYKO.

Síðar sama dag átti ég leið í Kópavoginn og kíkti þá eftir perum í BYKO. Jú, þeir áttu fullt af E12 en allar pakkningarnar voru með þremur mislitum perum, glærum eða eingöngu bláum og grænum. Ekki ein pakkning fannst með einungis rauðum perum. Mér þótti illt að kaupa þrjá mislita pakka þar sem ein peran væri rauð, og þurfa þannig að kaupa alls níu perur. Í vangaveltunum fæddist sú hugmynd að kaupa tvær pakkningar með samtals sex grænum perum og blanda saman rauðu og grænu í seríunni. Því meira sem ég leitaði að rauðu perunum fannst mér "græna" hugmyndin betri og endaði því á að kaupa tvo pakka af E12 grænum perum á 599 krónur hvorn - það var engin útsala í BYKO en þó voru perurnar á sama verði og 25% afsláttarperurnar í Húsasmiðjunni. Var ekki líka Húsasmiðjan einhverntíma heimsfræg um allt Ísland fyrir útsölurnar sínar?

Sonurinn er meiri stærðfræðihaus en ég og við komumst að þeirri sameiginlegu niðurstöðu að ef þriðja hver pera væri græn en endaperurnar undanskildar reglunni fengjum við út blöndu sem gæti t.d. verið rauð endapera, svo tvær rauðar/ein græn, tvær rauðar/ein græn o.s.frv. Við gætum líka haft, auk rauðu endaperunnar, rauða/græna/rauða og þannig koll af kolli. Röðin yrði raunar nánst sú sama því eðlilega myndi hvert þriggja peru kombó byrja og enda með rauðri og því alltaf tvær rauðar saman og ein græn á milli en endarnir yrðu eðlilegri því þeir yrðu þá líka rauð/rauð græn.

Þetta kostaði þónokkrar vangaveltur og enn var óvíst hvort nokkuð ljós kæmi á seríuna yfir höfuð, þrátt fyrir nýjar perur. Eftir að hafa hreinsað nokkur perustæði sem spanskgræna hafði sest í var hafist handa um hina stærðfræðilegu uppröðun, svo var stungið í samband og viti menn: Plastgrindin ljómaði öll af rauðu og grænu!

Degi seinna var farið í að setja seríuna á svalahandrið mæðgnanna í Kópavogi. Ég hafði gert verðkönnun á plast-spennuböndum og komist að því að spennubönd sem kostuðu tvöþúsundkall í Húsó kostuðu 1550 í BYKO. Ég keypti tvær stærðir og mætti svo með allt dótið inn á stofugólf. Ekki var þó björninn unninn því nú tóku við aðrar stærðfræðilegar pælingar - þ.e. lengdarmunur á seríunni og svalahandriðinu. Með því að leggja hálfa seríuna á stofugólfið og mæla lengd hennar fann ég út heildarlengdina. (Það var ekki fyrr en síðar sem ég áttaði mig á að það hefði verið nóg að mæla eitt perubil og margfalda svo. Ég var aldrei stærðfræðiséní...)

Þegar svalahandriðið hafði verið mælt og perufjöldanum jafnað niður á þá lengd var hafist handa um að festa seríuna. Það gekk ljómandi vel og innan skamms ljómuðu rauð/grænu perurnar móti vestri. 

Svo nú eru svalirnar í Ástúni 2 í Kópavogi upplýstar af seríu sem öðlaðist framhaldslíf eftir að hafa verið hent í ruslagám og hirt úr honum aftur. Hún gleður sannarlega íbúana og kannski einhverja þeirra sem leið eiga hjá..................



Herjólfur siglir frá Þorlákshöfn kl. 11:45 og ekki seinna vænna að hafa sig af stað. Ég á eftir að pakka enda morgninum eytt í tilgangslítil skrif um hluti sem flestir þekkja vel - og sumir alltof vel. 

Yfir og út!

09.12.2014 07:54

"Ekkert ferðaveður".


Þessi tvö orð, "Ekkert ferðaveður" hafa heyrst nokkuð oft undanfarið. M.a.s. hér á suðvesturhorninu, þar sem haustið hefur farið óvenju mjúkum höndum um okkur íbúana, rekur nú hver dagurinn annan þar sem varað er við illviðrum og erfiðri færð - jafnvel innanbæjar.

Það er þriðjudagur og illviðri gærdagsins stendur enn. Mokstur á götum stendur yfir og af fréttum að dæma miðar þokkalega en hryðjur tefja þó verkið. Áfram á að blása kröftuglega, ýmist með eða án ofankomu og loks þegar spár benda til að sloti - þ.e. á föstudag - skiptir yfir í hörkufrost.

Það er einmitt á föstudaginn sem ég á pantað far með Herjólfi til Vestmannaeyja!

Ég pantaði farið gegnum tölvuna og þar er talað um Landeyjahöfn/Eyjar. Nú skilst mér að Landeyjahöfn sé nær gleymd þessa dagana þegar hver sunnanstormurinn af öðrum veltir stórsjóum upp að ströndinni. Allar ferðir Herjólfs undanfarið hafa verið til Þorlákshafnar.

Það verður þá að hafa það. Út vil ek......

Þegar ég kem til baka - ef ég kemst til baka - verða komin jól. Það hefur nefnilega komið rækilega fram á liðnum árum að jólin mín koma þann 15. desember. Ég miða öll jólaverk við þann dag, eftir þann 15. er engu sinnt nema því sem beinlínis lýtur að jólaundirbúningi og  -haldi. Ég hef áður lýst því hvernig ég týndi jólabarninu í mér og fann það svo aftur mörgum árum -jafnvel áratugum - síðar. 

Síðan hefur alltaf verið gaman á jólunum. Gagnstætt því sem einhverjir gætu haldið hafa þau jól sem við Bassi höfum haldið tveir saman hér í Höfðaborg verið í tölu þeirra skemmtilegri, enda hafa hápunktarnir, aðfangadagskvöld og gamlárskvöld verið haldnir sameiginlega með þeim hluta fjölskyldunnar sem annarsstaðar býr. Nú er búið að jólaskreyta Höfðaborgina og þessi jólin erum við þrír í heimili því sonurinn (þ.e. minn, ekki Bassa..) hefur búið hjá okkur undanfarna mánuði.

Meðan ég dvel í Eyjum og rifja upp landsbyggðarjólaundirbúning verður Bassi hjá "hinum" foreldrum sínum í Hafnarfirði. Þangað hefur hann alltaf verið velkominn og það er ómetanlegt fyrir hund að eiga tvær fjölskyldur þegar ferðalög standa fyrir dyrum. 

Fram til föstudagsins er nóg af verkefnum. Ég hef lofað að koma upp jólaseríu á svalirnar hjá mæðgunum í Kópavogi, þeim EH, Áróru og Bergrós Höllu. Við það ætla ég að standa - ef ég fæ seríuna til að virka. Það er semsagt þriðjudagsmorgunn, tíminn líður og verkið bíður........... 

Út að moka og skafa!


  • 1
Flettingar í dag: 28
Gestir í dag: 1
Flettingar í gær: 115
Gestir í gær: 7
Samtals flettingar: 59230
Samtals gestir: 15667
Tölur uppfærðar: 29.3.2024 07:48:27


Tenglar